- वि.सं २o८१ बैशाख २२ शनिबार
काठमाडौं महानगरपालिकाले टोलटोलमा गएर पिसिआर परीक्षणका लागि स्वाब संकलन गर्न थालेपछि स्थानीय खुसी भएका छन् ।
सरकारी निर्णयअनुसार केसी समय बन्द रहेको स्वाब संकलनको काम महानगरले सुरु गरेपछि स्थानीय खुसी भएका हुन् ।
वडा कार्यालयहरूमार्फत जनशक्ति परिचालन गरी पिसिआर परीक्षणका लागि महानगरले स्वाब संकलन गरिरहेको छ ।
स्थानीय आदर्श लामिछाने महानगरको उक्त कामलाई समुदायको सुरक्षाका लागि राम्रो कदम चालेको बताउँछन् ।
यसले जोखिम व्यवस्थापनमा महानगरपालिकाको सक्रियता बढेको महसुस भएको उनले बताए ।
काठमाडौं महानगरपालिकाले अझ बृहत् रूपमा स्वाब संलकन गर्न सके सबैको पहुँचमा पुग्ने आशा स्थानीयले व्यक्त गरेका छन् ।
अहिले विभिन्न मापदण्ड बनाएर स्वाब लिइरहेको महानगरलाई स्थानीय उद्धवप्रसाद लामिछानेले अधिकांश जनता सशुल्क परीक्षण गर्न सक्ने अवस्थामा नभएकाले अभियानलाई बृहत् बनाउनुपर्ने सुझाब दिए ।
अर्का स्थानीय फाल्गुनी दाहालले केही समय बन्द भएर पुनः निःशुल्क स्वाब संलकन भइरहेकोमा खुसी व्यक्त गर्दै महानगरपालिकाले मात्रै नभएर अन्य ठाउँमा पनि यसरी नै अभियान चलाउनुपर्ने माग गरे ।
काठमाडौं महानगरपालिका– ६ का वडाध्यक्ष दीपेन्द्र लामाले संक्रमितको संख्या बढ्दै गएपछि कन्ट्याक्ट ट्रेसिङ र सरकारले तोकेको मापदण्डका आधारमा स्वाब संकलन थालिएको बताए ।
संक्रमित एकाघरका ट्रेसिङमा परेका व्यक्तिको स्वाब संकलन थालिएको उनले बताए ।
कोरोनाको निःशुल्क परीक्षण नगर्ने सरकारी निर्णय सर्वोच्च अदालतको आदेशपछि बदर भएपछि अहिले सरकार र स्थानीय तहहरूले मापदण्ड बनाएर कोरोना परीक्षण गरिरहेका छन् ।
अन्य जिल्लाहरूमा कोरोना संक्रमितको संख्या घट्दै गएपछि काठमाडौं उपत्यकामा भने दिनदिनै संक्रमित बढिरहेका छन् ।
महानगरपालिकाले अशक्त, वृद्धवृद्धाहरूको मोबाइल भ्यानमार्फत स्वास्थ्यकर्मी खटाएर स्वाब संकलन गरिरहेको छ ।
