मुख्य समाचार डिजिटल संस्करण

कांग्रेसका सबै सांसदले दसैँ भत्ता फिर्ता गर्ने 

नेपाली कांग्रेसले आफ्ना सबै सांसदको खातामा दसैँ भत्ताबापत जम्मा गरेको रकम फिर्ता गर्न संसद् सचिवालयलाई औपचारिक पत्र पठाउने तयारी गरेको छ  ।

कांग्रेस संसदीय दलले संसद् सचिवालयलाई पत्र पठाएर आफ्ना सबै सांसदको दसैँ भत्ताबापतको रकम कट्टा गर्न आग्रह गर्ने भएको हो । 

कांग्रेसका प्रमुख सचेतक बालकृष्ण खाणले सोमबार नै संसद् सचिवालयमा पत्र पठाएर भत्ताको रकम कट्टा गर्न आग्रह गरिने बताए ।

‘कोरोना परीक्षण र संक्रमितको निःशुल्क उपचार गर्नुपर्ने राज्यको दायित्वबाट सरकार पन्छिएको अवस्था छ,’ उनले भने, ‘यस्तो अवस्थामा सांसदलाई दसैँ भत्ता दिनु गलत हो ।’ उनले यस्तो वेला आमनागरिकको औषधोपचार र खानपानको सुनिश्चितता राज्यको पहिलो प्राथमिकता हुनुपर्ने बताए ।

सांसदलाई दसैँ भत्ता दिएको समाचार सार्वजनिक भएपछि फिर्ता गर्ने होड चलेको छ । सत्तारुढ दलकै सांसदले पनि भत्ता दिएकोमा आपत्ति जनाउँदै फिर्ता गर्न सुरु गरेका छन् ।