बलात्कारविरुद्ध सिराहामा युवाहरूले प्रदर्शन गरेका छन् । दसैँको पहिलो दिन घटस्थापनाको अवसर पारेर युवाहरूले देशमा दैनिकजसाे भइरहेका बलात्कारका घटनाविरुद्ध प्रदर्शन गरेका हुन् ।
कालो टिसर्ट तथा टाउकोमा कालो पट्टी बाँधेर, विभिन्न नारासहितका प्लेकाड बोकेर युवाहरूले सदरमुकामका मुख्य सडकमा प्रदर्शन गरेका थिए ।
‘गौरवशाली मिथिलावासी हम् सीता पुजैछी, बेटी लुटैछी, चुपचाप बैठैछी’, ‘हामी सुरक्षित रहन चाहन्छौँ, हामी बलात्कृत हुन चाहँदैनौँ, ‘जन्मेपछि मार्नुभन्दा बरु गर्भमै मारिदे’, ‘कति भयो अति भयो, सरकार केही गर अब त छटपटी भयो’, ‘बलात्कारीलाई मृत्युदण्ड देऊ’ जस्ता नारासहित प्रदर्शन भएको छ ।
बलात्कारविरुद्धको अभियानको संयोजन गरेका स्थानीय युवा जितेश कर्णले देशमा दैनिक भइरहेको बलात्कारका घटना र सिराहा जिल्लामा बलात्कारका घटनामा दोषीलाई उन्मुक्ति दिन गरिने पञ्चायतविरुद्धमा प्रदर्शन भएको बताए ।
प्रदर्शनमा उत्रेका युवाहरूले चर्का नारासहित सरकारलाई बलात्कारीविरुद्धमा कडा कदम चाल्न आग्रह गरेका छन् । उनीहरूले बलात्कारविरुद्धको प्रदर्शनका क्रममा हस्ताक्षर संकलनसमेत गरेका छन् ।