एकल पुरुषलाई पनि भत्ता दिन प्रदेश सांसदको माग
प्रदेश १ सभाका सांसद प्रतापप्रकाश हाङगामले एकल पुरुषलाई पनि भत्ता दिन माग गरेका छन् । प्रदेश १ सभाको बजेट अधिवेशनको शुक्रबारको बैठकको शून्य समयमा बोल्दै सांसद प्रतापप्रकाशले एकल महिलालाई जस्तै पुरुषलाई पनि सामाजिक सुरक्षा भत्ता दिन माग गरेका हुन् ।
नेपाली कांग्रेसको तर्फबाट हिमाली जिल्ला ताप्लेजुङबाट निर्वाचित सांसद हाङगामले समाजमा महिलाहरू जस्तै एकल पुरुषहरू पनि पीडित भएकाले उनीहरूलाई सामाजिक भत्ता दिनुपर्नेमा जोड दिए ।
सांसद हाङगामले सरकारले एकल महिलालाई भत्ता दिएको, तर एकल पुरुषलाई वञ्चित गराएर विभेद गरेको आरोप लगाए । उनले भने, ‘एकल पुरुषलाई पनि समाजले राँडो भनेर हेला गर्छ ,जबर्जस्ती बिहे गर्न बाध्य बनाउँछ, यसैले उनीहरूलाई पनि सामाजिक भत्ता आवश्यक पर्छ ।’