बलात्कार प्रयास गरेको आरोपमा साढे सातवर्ष कैद मागदाबी गर्दै काठमाडौं जिल्ला अदालतमा अभियोगपत्रसहित पेश गरिएका पूर्व सभामुख कृष्णबहादुर महराको मुद्दामा आइतबार थुनछेक बहस सकिएन ।
काठमाडौं जिल्ला अदालतका न्यायाधीश सुदर्शनराज पाण्डेको इजलासमा आइतबार सरकार पक्षबाट सहन्यायाधीवक्ता चन्द्रकान्त खनाल, जिल्ला न्यायाधीवक्ताद्वय हरिप्रसाद ग्मी र उमाकान्त पाैडेल र जिल्ला सहायक न्यायाधीवक्ता सृजना ढकालले बहस गरेका थिए ।
महराको पक्षबाट वरिष्ठ अधिवक्ता लभ मैनाली र अधिवक्ता भोजराज आचार्यले बहस गरे । महराको पक्षबाट बहस गर्न ५ जना वरिष्ठ अधिवक्तासहित ३५ जनाले वकालतनमा भरेका थिए । महराको पक्षबाट बहस बाँकी भएकाले सोमबार पनि थुनछेक बहस हुनेछ । विहान साढे ११ बजेबाट सुरु भएकाे बहस अपरान्ह ४:१५ मा सकिएकाे थियाे ।
बहस सकिएपछि मात्र अदालतले साधारण तारिख, धरौटी वा थुनामा राख्ने आदेश दिनेछ ।
संसद सचिवालयकी एक महिला कर्मचारीले महरामाथि बलात्कार प्रयास गरेको भन्दै प्रहरीमा जाहेरी दिएकी थिइन् । सोही आरोपमा महरालाई पक्राउ गरि मुद्दा चलाइएको हो ।