देउवालाई सुजाताको आग्रह– अब पदका लागि नलड्नुस्, अभिभावक बन्नुस्

नेपाली कांग्रेसकी नेतृ सुजाता कोइरालाले पार्टीभित्रको इतर पक्षलाई अहंकार त्यागेर मूल प्रवाहमा समाहित हुन र एकताको पक्षमा उभिन आग्रह गरेकी छिन्। कांग्रेस केन्द्रीय कार्यसमिति बैठकमा बोल्दै नेतृ कोइरालाले निवर्तमान सभापति शेरबहादुर देउवालाई पदको लडाइँ छाडेर अभिभावकीय भूमिका निर्वाह गर्न र त्याग देखाउन सुझाव दिइन्।

राष्ट्रप्रतिको जिम्मेवारीबोध गर्दै पद र गुटभन्दा माथि उठेर एकताबद्ध हुन आह्वान गरेकी उनले सभापति गगनकुमार थापा सबै पक्षप्रति लचिलो र जिम्मेवार रूपमा प्रस्तुत भइरहेको भन्दै उनको नेतृत्व शैलीको प्रशंसा गरिन्।

बैठकमा आफ्ना पिता तथा पूर्वप्रधानमन्त्री स्वर्गीय गिरिजाप्रसाद कोइरालालाई स्मरण गर्दै नेतृ कोइरालाले भनिन्, ‘गिरिजाबाबुले सधैँ भन्नुहुन्थ्यो– कांग्रेस जबजब बलियो र लोकप्रिय हुन्छ, तबतब यसका विरुद्ध अनेक षड्यन्त्रहरू सुरु हुन्छन्। आज ठिक त्यस्तै अवस्था देखिएको छ।’ उनले बाह्य तथा आन्तरिक षड्यन्त्रका बाबजुद सभापति थापाले पार्टीलाई अत्यन्तै कुशल र परिपक्व ढंगले अगाडि बढाइरहेको बताइन्।

सुरुवाती दिनमा थापाले पार्टी कसरी हाँक्लान् भन्ने आफूलाई चिन्ता लागेको स्मरण गर्दै उनले अहिले थापाले आफ्नो कार्यक्षमता र व्यवहारबाटै सफल नेतृत्व प्रमाणित गरिसकेको जिकिर गरिन्। थापाको सभापतित्वपछि पार्टीमा नयाँ पुस्ता र युवाहरूको व्यापक आकर्षण बढेको दाबी गर्दै उनले भनिन्, ‘अबको पाँच वर्षपछि हुने आमनिर्वाचनमा कांग्रेसले स्पष्ट बहुमत ल्याउनेछ, साथै सातै प्रदेश र स्थानीय तहहरूमा समेत कांग्रेसकै वर्चस्व र बहुमत कायम हुनेमा म पूर्ण विश्वस्त छु।’