- वि.सं २o८३ श्रावण १५ शुक्रबार
फिफाले अखिल नेपाल फुटबल संघ (एन्फा)माथि निलम्बन लगाएसँगै घरेलु तथा अन्तर्राष्ट्रिय फुटबल ठप्प हुँदा राष्ट्रिय टोलीका एरिक विष्ट र अनन्त तामाङले बंगलादेशको व्यावसायिक लिग खेल्ने भएका छन् । बंगलादेश प्रिमियर लिग (बिपिएल) सिजन २०२६/२७ का लागि फोर्टिस एफसीले मिडफिल्डर एरिक र सेन्टर ब्याक अनन्तलाई अनुबन्ध गरेको हो । उनीहरूले एएफसीले आयोजना गर्ने एएफसी च्यालेन्ज लिग खेल्नेछन् । एरिक र अनन्तले पछिल्लो समय चर्च ब्वाइज युनाटेडबाट खेल्दै आएका छन् ।
दोस्रोपटक बंगलादेशबाट खेल्दै
एरिक र अनन्तले दोस्रोपटक बंगलादेशको लिग खेल्दै छन् । एरिकले गत सिजन ब्रदर्स युनियनबाट खेलेका थिए । १० टोली सहभागी लिगमा युनियन सातौँ भएको थियो । अनन्त लगातार दोस्रोपटक फोर्टिसमा आबद्ध भएका हुन् । गत सिजन फोर्टिसले तेस्रो स्थानमा रहेर लिगको अन्त्य गरेको थियो । बंगलादेश प्रिमियर लिगको नयाँ सिजन २८ अगस्टबाट सुरु हुनेछ । अघिल्लो संस्करणको लिग करिब आठ महिना सञ्चालन भएको थियो । अनन्त र एरिक दुवैले क्लबसँग सिजन अवधिभरका लागि सम्झौता गरेका हुन् ।
दुई वर्षदेखि एएफसीको प्रतियोगिताविहीन नेपाल
नेपालका घरेलु शीर्ष डिभिजनका क्लबले दुई वर्षअघि एएफसी प्रतियोगिता खेलेका थिए । दुई वर्षअघि चर्च ब्वाइजले एएफसी च्यालेन्ज लिगमा भाग लिएको थियो ।
दशरथ रंगशालामा चर्च ब्वाइज भुटानको पारो एफसीसँग २–१ ले पराजित भएको थियो । सो खेलमा अनन्त र एरिक दुवैले खेलेका थिए । सहिद स्मारक ‘ए’ डिभिजन लिग अन्तिमपटक ०७९/८० आयोजना भएको थियो । लिग नियमित नहुँदा नेपाली क्लबले एएफसीको प्रतियोगिता पनि नियमित खेल्न पाएनन् ।
