खेलकुद प्रिन्ट संस्करण

‘सी’ डिभिजन लिगमा खेलाडी दर्ताबारे छानबिन गर्न माग

सहिद स्मारक ‘सी’ डिभिजन क्लब खेलिरहेका नौवटा क्लबले खेलाडी दर्तासम्बन्धी छानबिनको माग राखी अखिल नेपाल फुटबल संघ (एन्फा) अध्यक्ष पंकजविक्रम नेम्वाङलाई ध्यानाकर्षण गराएका छन् । लिगमा आरसी ३२ ले खालीबारी युवा क्लब तथा महावीर क्लबबीचको खेलमा नियमविपरीत खेलाडी मैदानमा उतारेको दाबी ती क्लबले गरेका छन् । 

महावीर क्लब, खालीबारी युवा फुटबल, स्वयम्भू, सामाजिक युवा, झम्सीखेल युथ, मनोहरा एकीकृत युवा, पुल्चोक स्पोर्टस्, गोलबजार स्पोर्टस् र समाज कल्याण खेलकुद केन्द्रका पदाधिकारीले एन्फा अध्यक्ष नेम्वाङलाई खेलाडी दर्तामा छानबिनसँगै दोषीमाथि कारबाहीको माग राखेका हुन् । लिगमा एक खेलाडी एक क्लबमा मात्र दर्ता भएर खेल्न सक्ने नियम छ । तर, आरसी ३२ ले ‘बी’ डिभिजन क्लब झापा फुटबलमा आबद्ध सुमनबहादुर मगरलाई ‘सी’ डिभिजन लिग खेलाइरहेको छ । गत २२ चैतमा खालीबारीविरुद्धको खेलमा मगरले प्रतिस्पर्धा गरेपछि नौ क्लबले एन्फालाई पत्राचार गरेका थिए । 

एन्फाले कारबाहीको प्रक्रियामा रहेको भन्ने मौखिक जानकारी दिएको थियो । आरसी ३२ ले पुनः ४ वैशाखमा महावीर क्लबसँगको खेलमा मगरलाई टोलीमा सामावेश गरेको थियो । मगरले झापा क्लबबाट रिलिजपत्र ल्याए पनि खेलाडी दर्ता ४८ घन्टाअघि नै हुनुपर्ने फिफाको नियम भएको छ । यसैबीच क्लबहरूले गत २५ चैतमा हुने भनिएको ‘बी’ डिभिजन लिग अहिलेसम्म नभएको पनि आपत्ति जनाएका छन् । ‘बी’ डिभिजन लिग घोषणा नभए ‘सी’ डिभिजन लिग बीचैमा स्थगित हुन सक्नेमा पनि उनीहरूले सचेत गराएका छन् ।