समाचार डिजिटल संस्करण

मधेशका वनमा जताततै डढेलो

नियन्त्रणका लागि बजेट र कर्मचारी अभाव देखाएर पन्छिन्छन् सरकारी निकाय 

मधेशको वन क्षेत्रमा जताततै डढेलो लागेको छ। डढेलोबाट मधेश प्रदेशका स–साना बिरुवा नष्ट हुन थालेका छन् भने पूर्व–पश्चिम राजमार्गमा समेत यात्रा गर्न जोखिम बढाएको छ।

लामो समयदेखिको खडेरी तथा पानी नपरेकाले गर्मीयाम सुरु भएसँगै डढेलो फैलिँदै गएको हो। मधेशका जिल्लाको वन क्षेत्रभित्रका राष्ट्रिय वन (सामुदायिक वन), साझेदारी वनमा तथा पूर्व–पश्चिम लोकमार्ग वरपरका वन क्षेत्रमा धुँवाको मुस्लो जताततै देखिन्छ। 

मधेशमा सबैभन्दा बढी रौतहटमा २२ हजार हेक्टरमा डढेलोले क्षति गरेको छ। विशेषगरी भुइँ आगोका कारण यस क्षेत्रमा डढेलो नियन्त्रणमा लिनसमेत सकिएको छैन भने यस प्रदेशमा रहेको एक मात्र पर्सा राष्ट्रिय निकुञ्जको एक सय हेक्टरभन्दा बढी स्थानमा डढेलो लागेको छ। 

यता पर्सामा भने  ५० हेक्टरमा डढेलो लागेको थियो । वर्षाका कारण डढेलो नियन्त्रणमा आएपछि पछिल्लो समयमा भने पुनः केही स्थानमा फाट्टफुट्ट डढेलोले क्षति गरेको छ। यस्तै बारामा ५०, महोत्तरीमा ३०, धनुषामा २०, सिराहामा १०, सप्तरीमा २० हेक्टर क्षेत्रमा हालसम्म डढेलोले क्षति गरिसकेको छ। 

आठ जिल्ला रहेको यस प्रदेशको सर्लाहीमा भने डढेलो खासै क्षति गरेको छैन। यस क्षेत्रमा फाट्टफुट्ट आगेलागी भए तापनि तुरुन्तै नियन्त्रण लिइएका कारण क्षति हुन नसकेको डिभिजन वन कार्यालय सर्लाहीका प्रमुख मञ्जुर अहमदले जानकारी दिए।  

डढेलोले वन्यजन्तु, बोटविरुवा, वनस्पति, जडीबुटी र काठ–दाउरालगायतका जैविक तथा पर्यावरणीय क्षति बढ्दो छ। तर, पर्याप्त बजेट र कर्मचारीको अभावका कारण डढेलो नियन्त्रण गर्न सरकारी निकायले प्रभावकारी पहल गरेको छैन। 

डढेलो रोकथाम तथा नियन्त्रणका लागि नयाँ प्रविधि र वैज्ञानिक विधिको प्रयोगमा कुनै पक्षले जोड नदिएको हुँदा डढेलो रोकथाम तथा नियन्त्रणका लागि स्थानीय बासिन्दालाई जिम्मेवार बनाउन पनि कसैले पहल नगरेकाले समस्या कायमै छ।

यता स्थानियले वनजंगलमा आगो लगाउँदा पालुवा राम्रो पलाउँछ र घाँस राम्रो हुन्छ भन्ने गलत सोचाइका कारण वनजंगलमा डढेलो लगाउने क्रम बढ्दै गएको छ। वनजंगलमा लागेको डढेलोका कारण पानीका मुहानसमेत सुक्दै गएका छन्। 

बाराको निजगढ, कोल्हवी र जितपुरसिमरा नगर क्षेत्रभित्र राष्ट्रिय निकुञ्ज, राष्ट्रिय वन छन्। केही दिनअघि निकै संवेदनशील मानिने पेट्रोलियम पदार्थको भण्डारण रहेको नेपाल आयल निगम अमलेखगञ्ज डिपोनजिकैको पर्सा राष्ट्रिय निकुञ्जको वनमा डढेलो लागेको थियो, पेट्रोलियम पदार्थ भण्डारण भएको नजिकैको वनमा डढेलो लागेका कारण स्थानीय निकै डराएका थिए। तर, वन, निकुञ्ज, प्रहरी, सेना र स्थानीयको प्रयासमा डढेलो नियन्त्रण आएको थियो। 

यहाँ डढेलो लगाउनेहरू कहिल्यै समातिँदैनन्, जितपुरसिमरा उपमहानगरपालिका– २१ का वडाध्यक्ष सुभाष श्रेष्ठले भने, ‘डढेलो बस्तीमै आइपुग्ने चिन्ताले राम्ररी सुत्न सकिने अवस्था पनि छैन। पेट्रोलियम पदार्थ भण्डारणछेउको जंगलमा आगो लागेमा रातभर जाग्राम बस्नुको विकल्प छैन।’

वन सम्पदा सुरक्षामा नभई वनको उपभोगमा मात्र लागेका कारण वनका कर्मचारीको उदासीनताले वन उजाड हुँदै गएको रौतहट चन्द्रपुर नगरपालिका– ६ स्थित लमहाकी फूलमाया पुलामीले बताइन्।

वन कर्मचारीको उदासीनताले वन सखाप भइरहेको उनको भनाइ छ। डढेलो लगाए नयाँ घाँस पलाउने विश्वासले वनमा डढेलो लगाउने गरेको पाइन्छ। गोठालाले बढीजसो डढेलो लगाउने गरेका पाइएको छ। रौतहट जिल्लाको वन क्षेत्र मासिने क्रम बढेको छ।

पर्याप्त जनशक्ति नहुँदा सबै क्षेत्रमा सघन गस्ती गराउन नसकिएको कर्मचारी बताउँछन्। डढेलो नियन्त्रणमा सर्वसाधारणको सहयोग आवश्यक भएको डिभिजन वन कार्यालय रौतहटका प्रमुख शैलेन्द्रकुमार मिश्रले बताए। 

वन क्षेत्रको नियमित गस्ती र कारबाही प्रक्रिया दुरुस्त गर्न वन सुरक्षा र जिल्लास्थित अन्य सुरक्षा निकायको समन्वयमा संयुक्त टोली बनाएर संयुक्त गस्ती बढाइनुपर्छ भने वन क्षेत्रभित्र सशस्त्र प्रहरी पोस्टसमेत सञ्चालनमा भए सर्वसाधारणले वनमा डढेलो लगाउने हिम्मत गर्ने थिएनन्। 

डढेलोले वन तथा वन्यजन्तुमा परेको असरको मूल्यांकन गरिँदैन

मधेश प्रदेशका वनमा भएको डढेलोले वन्यजन्तुमा पारेको असरको मूल्यांकन गरिएको पाइँदैन। सामान्यतया वन वा निकुञ्जमा आगो लाग्दा ठूलाठूला जनावरहरू आगो नलगेको क्षेत्रहरूमा जान्छन् भन्ने विश्वासका कारणसमेत वनमा भएको डढेलोको क्षतिबारे मूल्यांकन गरिने गरेको पाइँदैन। 

मृग प्रजाति, शाकाहारी वा मांसाहारी आहार खाने प्रजातिका जनावरहरू त्यति मर्दैनन्। तर, घस्रने प्रजातिका साना जीव र कमिलाजस्ता किराहरू मर्छन्। तर, त्यो संख्या पुनः कायम हुन्छ। गुँड लगाइरहेको अवस्था छ भने चराहरूमा पनि असर पर्छ । डिभिजन वन कार्यलयका प्रमुख विनोद सिंहले भने, ‘असरको मूल्यांकन नै गरिएको छैन। तर, निश्चित क्षेत्र (ब्लक)मा आगो लाग्ने भएकाले वनको हकमा त्यति ठूलो असर परेको छैन।’

त्यसबाहेक आगलागीले घाँस र रुखहरू नष्ट पार्दा सबै किसिमका जनावरहरू जंगलबाट विस्थापित हुनुपर्ने अवस्था आउने गरेको विज्ञहरू बताउँछन्। आगलागी हुन नदिन फएरलाइन वा अग्निरेखाहरूसमेत बनाइएको नपाइएको विज्ञहरू बताउँछन्।

एकैचोटि ठूलो स्तरमा आगलागी हुँदा जनावरहरूलाई जोगिन गाह्रो हुने सामुदायिक वन उपभोक्ता महासंघ बाराका अध्यक्ष रामजी बजगाईंले जानकारी दिए। 

‘अनियन्त्रित हिसाबले आगो लाग्दा त्यसको केही न केही प्रभाव रहन्छ। जनावरहरू भागेर बाँच्न पनि सक्छन्, तर केही मर्छन् पनि । यस्तै अन्डा दिने प्रजातिहरूलाई त अप्ठ्यारो पर्ला नि, यसको अर्थ इकोसिस्टममा त आगलागीले समेत असर त गर्छ नै।’

सामुदायिक वन उपभोक्ता महासंघ बाराका अध्यक्ष बजगाईंले भने, ‘त्यही भएर आगलागी नियन्त्रणका विभिन्न वैज्ञानिक उपाय अवलम्बन गरिनुपर्छ तथा मानवीय हेलचेक्य्राइँका कारण डढेलो लाग्ने अवस्था आउन दिनहुन्न।’

डढेलोका कारण मधेशमा वायु प्रदूषण

मधेशका विभिन्न भागमा डढेलोको संख्यामा वृद्धि हुँदा मधेशमा वायु प्रदूषणसमेत बढेको छ। यस प्रदेशमा वायुको प्रदूषण अत्यधिक बढेको पाइएको छ। प्रदूषण बिहान र बेलुकी अत्यधिक बढेको हो।

वायु प्रदूषणकै कारण बारामा रहेको सिमरा विमानस्थलमा करिब एक हप्ता सम्पूर्ण उडान डिले गरिएको सिमरा नागरिक उड्डयन कार्यालयका प्रमुख तथा विमानस्थल प्रबन्धक सूर्यबहादुर खत्रीले जानकारी दिए। उनका अनुसार लो भिजिबिलिटीका कारण बिहान हुने सम्पूर्ण उडानलाई एक हप्तासम्म १२ बजेपछाडि सारिएको थियो, तर आजबाट भने केही सुधार भएको बताइएको छ।

यस्तै, डढेलोका कारण पूर्व–पश्चिम लोकमार्गमा चल्ने सवारीसाधनका चालकलाई समेत आँखा पोल्ने, बाटाेमा विपरीत दिशाबाट आएका सवारीसाधनसमेत देखिने अवस्था नभएको चालकले गुनासो गरेको जिल्ला ट्राफिक प्रहरी कार्यालय बाराका प्रमुख प्रहरी निरीक्षक रामकुमार महतोले बताए। उनले भने, ‘यस भेगमा चल्ने सवारीसाधनका चालकले जंगलमा लागेको आगलागीका कारण सवारी चलाउनसमेत कठिन भएको गुनासो हामीलाई गरेपछि हामीले वनलाई यसको जानकारी गराएका थियौँ।’

तराईका विभिन्न भागका जंगलहरूमा तीव्र रूपमा डढेलो फैलिएको छ। रौतहट, बारा, महोत्तरीलगायतका क्षेत्रमा अन्यत्र भन्दा बढी डढेलो फैलिएको छ। तराईका पहाडी तथा भित्री मधेशका जिल्लाका वनमा पनि डढेलो सक्रिय छ।

डढेलोका कारण वन्यजन्तु, बोटबिरुवा, वनस्पति, जडीबुटी र काठ–दाउरालगायतका जैविक तथा पर्यावरणीय क्षति बढ्दो छ। तर, पर्याप्त बजेट नभएको भन्दै डढेलो नियन्त्रण गर्न सरकारी तह र निकायबाट प्रभावकारी पहल भएको छैन। 

यता वायु प्रदूषणले बालबालिका, ज्येष्ठ नागरिक, श्वासप्रश्वासका बिरामी र मुटुका बिरामीलाई असर गर्ने भएकाले काम नपरेसम्म घरबाहिर ननिस्कन र निस्कनै परे सावधानी अपनाउन आग्रहसमेत गरिएको छ। यसैगरी, डढेलो अझै लागिरहे प्रदूषण अझै बढ्ने भएकाले डढेलो नियन्त्रणका लागि सम्बन्धित निकायले समयमै ध्यान दिन जरुरी देखिन्छ।