मुख्य समाचार प्रिन्ट संस्करण

नागार्जुन नगरपालिकाले तोक्यो निजी विद्यालयको शुल्क

नर्सरीको अधिकतम मासिक शुल्क ३७ सय, कक्षा १० को ५९ सय 

नागार्जुन नगरपालिकाले निजी (संस्थागत) विद्यालयले लिन पाउने शुल्क निर्धारण गरेको छ । नगर शिक्षा समितिको हालै सम्पन्न बैठकले शैक्षिक सत्र ०८१ मा विद्यालयले लिन पाउने शुल्कको अधिकतम सीमा निर्धारण गरेको हो ।

नगरपालिकाअन्तर्गत शिक्षा तथा सामाजिक शाखा प्रमुख कृष्णबहादुर कुँवरका अनुसार नगरपालिकाले निर्धारण गरेको शुल्क कडाइका साथ लागू हुनेछ । ‘तोकिएको शुल्क कार्यान्वयनमा कुनै सम्झौता हुन्न,’ प्रमुख कुँवरले भने । नगरपालिकाका अनुसार शिक्षा नियमावली, ०५९ अनुसार निजी विद्यालयको शुल्क निर्धारण गरिएको हो । संस्थागत विद्यालय शुल्क निर्धारण मापदण्ड निर्देशिका, ०७२ अनुसार विद्यालय वर्गीकरणका आधारमा आगामी शैक्षिक सत्रदेखि विद्यालयले लिन पाउने शुल्कको अधिकतम सीमा कायम भएको छ । 

नगरपालिकाका शिक्षा तथा सामाजिक शाखा प्रमुख कृष्णबहादुर कुँवर भन्छन्– 
नगरपालिकाले निर्धारण गरेको शुल्क कडाइका साथ लागू हुनेछ । तोकिएको शुल्क कार्यान्वयनमा कुनै सम्झौता हुन्न । ऐनले तोकेविपरीतका शीर्षकमा शुल्क लिए कारबाही गर्छौँ ।

नियमावलीले तोकेबाहेकका शीर्षकमा शुल्क लिए कारबाही
नगरपालिकाका अनुसार अनिवार्य तथा नि:शुल्क शिक्षासम्बन्धी नियमावली, ०७७ मा उल्लेख भएबमोजिम सार्वजनिक विद्यालयले माध्यमिक तहसम्म विद्यार्थी भर्ना शुल्क, मासिक पढाइ शुल्क, परीक्षा शुल्क र पाठ्यपुस्तकबापत कुनै पनि शीर्षकमा शुल्क लिन पाउनेछैनन् ।

यसैगरी, अनिवार्य तथा नि:शुल्क शिक्षासम्बन्धी ऐन, ०७५ मा उल्लेख भएबमोजिम प्रत्येक निजी विद्यालय र सार्वजनिक शैक्षिक गुठीअन्तर्गत सञ्चालित विद्यालयले प्रारम्भिक बालबिकासदेखि कक्षा १२ सम्म पाँच सयसम्म विद्यार्थी भए कम्तीमा १० प्रतिशत विद्यार्थीलाई नि:शुल्क शिक्षा दिनुपर्नेछ । पाँच सयदेखि आठ सयजनासम्म विद्यार्थी भएका विद्यालयले कम्तीमा १२ प्रतिशत र आठ सयभन्दा धेरै विद्यार्थी भएका विद्यालयले कम्तीमा १५ प्रतिशत विद्यार्थीलाई नि:शुल्क शिक्षा दिनुपर्नेछ ।

निजी लगानीका विद्यालयले शिक्षा नियमावली, ०५९ अनुसार मासिक पढाइ, वार्षिक भर्ना, परीक्षा, कम्प्युटर, स्थानान्तरण प्रमाणपत्र, विशेष प्रशिक्षण, आवास परिवहन र भोजन शुल्कबाहेक शुल्क लिन पाउनेछैनन् । यसैगरी, विद्यालयले आफ्ना विद्यार्थीलाई विद्यालयपरिसरभित्रै वा विद्यालयले तोकेको स्थान–पसलबाट पुस्तक, स्टेसनरी, पोसाकलगायत सामग्री खरिद गर्न बन्द गरी अभिभावकलाई खुला बजारबाट खरिद गर्ने व्यवस्था मिलाउनुपर्नेछ । यस नगरपालिकामा करिब ६० वटा संस्थागत विद्यालय छन् ।

यस्तो छ नगरपालिकाले निर्धारण गरेको शुल्क
- नगरपालिकाभित्र नर्सरीमा पढ्ने विद्यार्थीका लागि ‘क’ श्रेणीका विद्यालयले मासिक तीन हजार सात सय ५०, ‘ख’ श्रेणीकाले तीन हजार र ‘ग’ श्रेणीमा रहेका विद्यालयले दुई हजार चार सय शुल्क लिन पाउनेछन् । 

- एलकेजीका विद्यार्थीका लागि ‘क’ श्रेणीका विद्यालयले तीन हजार नौ सय, ‘ख’ श्रेणीकाले तीन हजार एक सय २५ र ‘ग’ श्रेणीकाले २५ सयसम्म शुल्क लिन पाउनेछन् ।

- युकेजी पढ्ने विद्यार्थीलाई ‘क’ श्रेणीका विद्यालयले चार हजार ५०, ‘ख’ श्रेणीकाले तीन हजार दुई सय ५० र ‘ग’ श्रेणीकाले २६ सय शुल्क लिन सक्नेछन् ।

- कक्षा एकमा पढ्नेलाई ‘क’ श्रेणीका विद्यालयले ४२ सय, ‘ख’ श्रेणीकाले ३३ सय ७५ र ‘ग’ श्रेणीकाले २७ सय रुपैयाँ मासिक शुल्क लिन पाउनेछन् ।

- कक्षा दुईमा पढ्नेलाई ‘क’ श्रेणीका विद्यालयले ४३ सय ५०, ‘ख’ श्रेणीकाले ३५ सय र ‘ग’ले २८ सयसम्म शुल्क लिन पाउनेछन् ।

- कक्षा तीनमा पढ्ने विद्यार्थीबाट ‘क’ श्रेणीका विद्यालयले ४५ सय ५०, ‘ख’ श्रेणीले ३६ सय ५५ र ‘ग’ श्रेणीका विद्यालयले २९ सय रुपैयाँ शुल्क लिन सक्नेछन् ।

- कक्षा चारमा पढ्नेबाट ‘क’ श्रेणीका विद्यालयले ४६ सय ७५, ‘ख’ श्रेणीकाले ३७ सय ५० र ‘ग’ श्रेणीकाले तीन हजार शुल्क लिन पाउनेछन् । 

- कक्षा पाँचमा पढ्ने विद्यार्थीका लागि ‘क’ श्रेणीका विद्यालयले ४८ सय ५०, ‘ख’ श्रेणीकाले ३८ सय ७५ र ‘ग’ श्रेणीका विद्यालयले ३१ सय रुपैयाँ शुल्क लिन पाउनेछन् ।

- कक्षा ६ मा पढ्नेलाई ‘क’ श्रेणीका विद्यालयले पाँच हजार, ख श्रेणीकाले चार हजार र ‘ग’ श्रेणीकाले ३२ सयसम्म शुल्क लिन सक्नेछन् ।

- कक्षा सातमा पढ्नेलाई ‘क’ श्रेणीका विद्यालयले ५१ सय ५०, ‘ख’ श्रेणीकाले ४१ सय २५ र ‘ग’ श्रेणीकाले ३३ सयसम्म शुल्क लिन पाउनेछन् ।

- कक्षा आठमा पढ्नेबाट ‘क’ श्रेणीका विद्यालयले ५३ सय २५, ‘ख’ श्रेणीकाले ४२ सय ५० र ‘ग’ श्रेणीकाले ३४ सय रुपैयाँ लिन पाउनेछन् । 

- कक्षा नौमा पढ्नेबाट ‘क’ श्रेणीका विद्यालयले ५८ सय, ‘ख’ले ४६ सय २५ र ‘ग’ श्रेणीका विद्यालयले ३७ सयसम्म शुल्क लिन सक्नेछन् ।

- कक्षा १० पढ्नेबाट ‘क’ श्रेणीका विद्यालयले ५९ सय ५०, ‘ख’ श्रेणीकाले ४७ सय ५० र ‘ग’ श्रेणीकाले ३८ सय शुल्क लिन सक्नेछन् ।

- कक्षा ११ र १२ पढ्ने विद्यार्थीका लागि भने एउटै शुल्क निर्धारण गरिएको छ । कक्षा ११ र १२ पढ्ने विद्यार्थीबाट ‘क’ श्रेणीका विद्यालयले सात हजार, ‘ख’ श्रेणीकाले ५६ सय र ‘ग’ श्रेणीकाले ४५ सयसम्म शुल्क लिन पाउने भएका छन् ।