- वि.सं २o८१ बैशाख १७ सोमबार
भरतपुरको रामपुरमा प्रथम अन्तरप्रदेश राष्ट्रिय खेलकुदको उद्घाटन गर्दै प्रधानमन्त्री प्रचण्डले भने– राष्ट्रिय गौरवको आयोजनामा गौतमबुद्ध अन्तर्राष्ट्रिय रंगशालालाई समावेश गर्दै आवश्यक बजेट प्रबन्ध हुँदै छ
प्रधानमन्त्री पुष्पकमल दाहाल प्रचण्डले आगामी आर्थिक वर्षमा गौतमबुद्ध अन्तर्राष्ट्रिय क्रिकेट रंगशाला निर्माण गर्न आवश्यक बजेटको व्यवस्था हुने बताएका छन् । भरतपुरको रामपुरमा आइतबार निर्माणाधीन क्रिकेट रंगशालामा प्रथम अन्तरप्रदेश राष्ट्रिय खेलकुद–२०८० को उद्घाटन गर्दै प्रधानमन्त्री प्रचण्डले राष्ट्रिय गौरवको आयोजनामा समावेश भएको रंगशालाको निर्माणका लागि आवश्यक बजेट निकासा हुने प्रतिबद्धता दिएका हुन् । ‘राष्ट्रिय गौरवको आयोजनामा गौतमबुद्ध अन्तर्राष्ट्रिय रंगशालालाई समावेश गर्दै आवश्यक बजेट प्रबन्ध हुँदै छ,’ उनले भने ।
प्रचण्डले ओलम्पियन सिंह थापा, वैकुण्ठ मानन्धर, राजकुमारी पाण्डे, दीपक विष्टलाई ओलम्पिक टर्च हस्तान्तरण गर्दै प्रतियोगिताको उद्घाटन गरेका हुन् । उद्घाटन सत्रमा प्रचण्डले रंगशालामा देखिएका विभिन्न समस्याको एकीकृत समाधान हुने विश्वास दिलाएका छन् । ‘राष्ट्रिय गौरवको आयोजनामा रूपान्तरण भएपछि रंगशाला निर्माणकार्यमा यसअघि देखिएका विभिन्न समस्याको एकीकृत समाधान हुनेछ,’ उनले भने, ‘निर्माणकार्य द्रुत रूपमा अगाडि बढ्नेछ । यसका निम्ति आगामी वर्षको बजेटमा पर्याप्त स्रोत सुनिश्चित गरिने व्यहोरासमेत अवगत गराउँछु ।’
क्रिकेट रंगशाला निर्माणपछि कृषि, पर्यटन, स्वास्थ्यका साथै चितवन र आसपासको क्षेत्र ‘स्पोर्टस् हब’का रूपमा विकास हुने प्रधानमन्त्रीको विश्वास छ । ‘रंगशाला निर्माणपछि यहाँ ठूला राष्ट्रियस्तरका प्रतियोगिता सम्पन्न गर्ने उपयुक्त वातावरण मिल्नेछ, यसले यस क्षेत्रलाई स्पोर्टस् हबका रूपमा विकास गर्न सकिन्छ,’ उनले भने, ‘प्रतियोगिताले युवा पलायन रोक्नसमेत मद्दत पुग्नेछ । राष्ट्रिय, प्रदेशस्तरीय एवं स्थानीयस्तरमा आयोजना हुने प्रतियोगिताको बहुआयामिक महŒव रहने विश्वास लिएको छु ।’
यसरी हुँदै छ प्रथम अन्तरप्रदेश राष्ट्रिय खेलकुद
सातै प्रदेशका टोलीको सहभागिता रहेको प्रतियोगितामा नौ खेल समावेश छन् । १ वैशाखसम्म चल्ने प्रथम अन्तरप्रदेश राष्ट्रिय खेलकुदमा फुटबल, भलिबल, क्रिकेट, बक्सिङ, कराँते, तेक्वान्दो, एथलेटिक्स, ब्याडमिन्टन र पौडीका खेलाडीले प्रतिस्पर्धा गर्नेछन् । भलिबलको महिला र पुरुषका समूहको खेल भरतपुरको गेस्टहाउस चौरमा हुने आयोजकले जनाएको छ । महिला फुटबल भरतपुर शारदानगरको बखान स्मृति रंगशालामा हुनेछ । गौरीटार रंगशाला हेटौँडामा पुरुष फुटबल हुनेछ । पुरुष र महिला क्रिकेट रामपुरमा निर्माणाधीन रंगशालाको नमुना मैदानमा हुने आयोजकले जनाएको छ ।
बक्सिङ, कराँते र तेक्वान्दो भरतपुरमा रहेको चितवन उद्योग संघको प्रदर्शनी केन्द्रमा हुनेछ । ब्याडमिन्टन भरतपुर कभर्डहलमा र एथलेटिक्स भरतपुर शारदानगरको चित्रवन रंगशालामा हुने आयोजकले जनाएको छ । पौडी खेल भरतपुर देवनगरमा रहेको हवेलीको स्विमिङ पुलमा हुनेछ । प्रतियोगितामा तीन हजारभन्दा बढीको सहभागिता रहने बागमती प्रदेश खेलकुद विकास समितिका सदस्यसचिव सूर्यलाल भण्डारीले बताए । प्रतियोगितामा एक सय ३६ स्वर्ण, एक सय ३६ रजत र एक सय ८४ कांस्यका लागि प्रतिस्पर्धा हुने उनले बताए ।
स्वर्ण विजेताले पाँच हजार पाउने
प्रतियोगिताका स्वर्ण विजेताले पाँच हजार, रजतले चार हजार र कांस्य विजेता खेलाडीले तीन हजार रुपैयाँ हात पार्नेछन् । हरेक खेलका उत्कृष्ट खेलाडीलाई १० हजार नगदबाट पुरस्कृत गरिनेछ । टिम च्याम्पियनलाई चाँदीको रनिङ सिल्ड प्रदान गरिने भण्डारीले बताए । प्रतियोगिता सञ्चालन गर्न १२ करोड खर्च हुने आयोजकले जनाएको छ । बागमती प्रदेश सरकार, सामाजिक विकास मन्त्रालय र प्रदेश खेलकुद विकास परिषद् बागमती प्रदेशले संयुक्त रूपमा आयोजना गरेको प्रतियोगिताको समापन हेटौँडाको गौरीटार रंगशालामा हुनेछ ।
