नेपाली पारा तेक्वान्दो खेलाडी पलेसा गोवर्धन यसै वर्ष फ्रान्समा हुने पेरिस पारा ओलम्पिक खेलकुद प्रतियोगिताका लागि आइतबार छनोट भएकी छिन् । चीनको ताइयाङमा भएको एसियाली छनोट प्रतियोगिताअन्तर्गत के–४४ क्याटेगोरीको महिला ५७ केजीमुनि पलेसाले स्वर्ण जित्दै पेरिस पारा ओलम्पिकमा स्थान सुरक्षित गरेकी हुन् ।

यो उपलब्धिसँगै पलेसा पारा ओलम्पिकका लागि छनोट हुने पहिलो नेपाली खेलाडी बनेकी छिन् । यसअघि तेक्वान्दोकै दुई खेलाडीले छनोट चरण पार गरेर ओलम्पिकमा प्रतिस्पर्धा गरेका थिए । संगीना वैद्यले २००४ को एथेन्स ओलम्पिकमा छनोट चरण पार गर्दैै स्थान पक्का पारेकी थिइन् । 

नेपालको खेलकुद इतिहासमा छनोट चरण पारी गरी ओलम्पिक खेल्ने समग्रमा वैद्य पहिलो खेलाडी हुन् । त्यसपछि दीपक विष्टले २००८ को बेइजिङ ओलम्पिकमा छनोट चरण पार गरेर खेलेका थिए । पलेसाले फाइनलमा इरानकी लेइला मिर्जाईलाई ५–४ को झिनो अन्तरले पराजित गरी स्वर्ण जित्दै इतिहास रचेकी हुन् । त्यसअघि सेमिफाइनलमा उनले उज्वेकिस्तानकी करिमा मेलिकुजिएभालाई १८–२ ले हराउँदै अन्तिम दुई स्थान पक्का गरिन् । पलेसाको स्पर्धामा चारजना खेलाडी सहभागी थिए । 

 टोकियो पारा ओलम्पिकको अनुभव
पारा छनोटको प्रत्येक स्पर्धामा पहिलो हुने खेलाडी पेरिस पारा ओलम्पिकलाई छनोट हुने प्रावधान थियो । पलेसा एसियाली पारा खेलकुदमा पदक जित्ने पहिलो र एक्लो नेपाली खेलाडी पनि हुन् । पलेसाले गत असोजमा चीनको हाङझाउमा भएको चौथो एसियाली पारा खेलकुदमा ऐतिहासिक कांस्य पदक जितेकी थिइन् । टोकियो पारा ओलम्पिक २०२० मा पनि पलेसाले २ ‘बाउट’ जितेर इतिहास रचेकी थिइन् ।

नेपालमा छनोट प्रतियोगिता खेलेपछि पलेसा चीनको सांघाई गएकी थिइन् । सांघाईबाटै पलेसा एसियाली छनोट खेल्न ताइयान गएकी थिइन् । उनी सांघाईको तोङजी विश्वविद्यालयमा आर्किटेक्चर अध्ययन गरिरहेककी छिन् । एसियाली छनोटमा नेपालबाट दुईजना पुरुष खेलाडीले पनि प्रतिस्पर्धा गरेका थिए । पुरुष ६३ केजीमुनि भरतसिंह महता र ५८ केजीमुनि अमीर ब्लोन पदकविहीन बने । एक ‘बाउट’ जितेका भरतले इन्डोनेसियाका खेलाडीलाई पराजित गरेका थिए ।