- वि.सं २o८१ बैशाख १८ मंगलबार
विभागीय टोली त्रिभुवन आर्मी क्लबले कोशी प्रदेश ट्रफी टी–२० राष्ट्रिय क्रिकेट प्रतियोगिताको उपाधि जितेको छ । विराटनगरस्थित वैजनाथपुर क्रिकेट रंगशालामा शनिबार कर्णाली प्रदेशमाथि नौ विकेटको सहज जित निकाल्दै आर्मीले उपाधि जितेको हो । विजेता आर्मीले पाँच लाख रुपैयाँसहित ट्रफी प्राप्त गर्यो । उपविजेता कर्णालीले तीन लाख रुपैयाँ जितेको हो ।
कर्णालीले प्रस्तुत गरेको १११ रनको लक्ष्य आर्मीले १२.२ ओभरमा मात्र एक विकेट गुमाउँदै पूरा गगरेको हो । आर्मीका लागि त्रितराज दासले ३३ बलमा पाँच चौका र दुई छक्काको मद्दतमा अविजित ५० रनको योगदान गरेका हुन् । इमरान शेखले अविजित ३८ र सन्तोष कार्कीले २१ रन बनाए ।
कर्णालीका लागि एक मात्र विकेट दिनेश अधिकारीले लिएका हुन् । त्यसअघि टस जितेर ब्याटिङ रोजेको कर्णालीले निर्धारित २० ओभरमा सबै विकेट गुमाउँदै एक सय १० रन बनाएको थियो । कर्णालीका कुनै पनि खेलाडीले ठूलो स्कोर बनाउन सकेनन् । लामो साझेदारीसमेत हुन सक्ने । विपिन रावलले सर्वाधिक २७ रन बनाए ।
कप्तान रवीन्द्र शाही र मनीष थापाले समान २१ तथा दिनेश अधिकारीले १२ रन बनाएका हुन् । आर्मीका लागि त्रितराज दास, साहब आलम, सुमित श्रेष्ठ र बसिर अहमदले समान दुई तथा पवन कार्कीले एक विकेट लिए । मोरङ क्रिकेट संघको आयोजनामा चैत २२ गते सुरु भएको प्रतियोगितामा तीन विभागीय र सात प्रदेशका टिमले सहभागिता जनाएका थिए ।
