रिटेल चेन भाटभटेनी सुपरमार्केटको २७औँ शाखा झापाको दमकमा खुलेको छ । कम्पनीले यही फागुन २३ गते दमकमा भाटभटेनी सुपरमार्केट उद्घाटन गरेको हो । सुविधाजनक सुपरमार्केटमा किनमेल गर्ने दमकवासीको चाहनालाई सम्मान गर्दै भाटभटेनी समूहले आफ्नो सेवा विस्तार गरेको कम्पनीले जनाएको छ । उद्घाटनका दिन हरेक सामानमा विशेष छुट दिइएको छ ।
‘ग्राहकको सन्तुष्टि हाम्रो लक्ष्य’ नाराका साथ अघि बढेको भाटभटेनी सुपरमार्केट देशभरका ग्राहकले रुचाएको किनमेल गन्तव्यमा पर्छ । भाटभटेनीमा घरायसी आवश्यकताका सबै सामान पाइन्छन् । काठमाडौं उपत्यकामा दर्जनभन्दा बढी सुपरमार्केट सञ्चालन गरिरहेको भाटभटेनीका सुपरमार्केट देशका सबैजसो प्रमुख सहरमा खुलिसकेका छन् ।
सन् १९८४ मा काठमाडौंको भाटभटेनीमा करिब १२० वर्गफिटको एउटा सटरमा सीमित कोल्डस्टोरबाट सुरु भएको भाटभटेनी रिटेल सेक्टरको ठूलो करदाता बनेको कम्पनीको भनाइ छ । करिब पाँच हजारजना पूर्णकालीन कर्मचारी रहेको भाटभटेनी सुपरमार्केटमा दैनिक आठ करोड रुपैयाँ हाराहारीको कारोबार हुने बताइएको छ ।
नेपालमा डिपार्टमेन्टल स्टोर संस्कृतिको विकासमा समेत योगदान रहेको भाटभटेनी सुपरमार्केटमा ताजा तरकारी र फलफूलदेखि विश्वविख्यात ब्रान्डसमेतका गरी एक लाख ५० हजार थरी वस्तु पाइने कम्पनीले जनाएको छ ।