नयाँ सत्तागठबन्धनमा सहभागिताका लागि प्रधानमन्त्री पुष्पकमल दाहाल प्रचण्ड र एमाले अध्यक्ष केपी ओलीले राखेको प्रस्तावमाथि एकीकृत समाजवादीले भोलि निर्णय लिने भएको छ ।
भोलि बिहान ११ बजे बस्ने समाजवादीको बैठकले सो प्रस्तावमाथि निर्णय लिने महासचिव घनश्याम भुसालले जानकारी दिए । उनले प्रधानमन्त्री र एमाले अध्यक्षले आफ्नो पार्टी अध्यक्ष माधवकुमार नेपालसमक्ष राखेको प्रस्ताव सकारात्मक नै रहेको बताए ।
उनले भेटघाटमा प्रधानमन्त्रीले नयाँ गठबन्धन बनाउनुपर्नाको कारणबारे विस्तृतमा व्याख्या गरेको भन्दै प्राविधिक कारणले मात्र गठबन्धनबारे एकीकृत समाजवादीलाई जानकारी गराउन नसकिएकामा आत्मालोचना गरेको बताए ।
परिवर्तित सन्दर्भमा एकीकृत समाजवादीलाई समेत नयाँ सत्तागठबन्धनमा सहभागी हुन प्रस्ताव लिएर आज साँझ प्रधानमन्त्री प्रचण्ड र एमाले अध्यक्ष ओली कोटेश्वरस्थित नेपालनिवास पुगेका थिए । त्यहाँ दुई घण्टासम्म छलफल चलेको थियो ।
छलफलमा एमाले उपाध्यक्ष विष्णु पौडेल, महासचिव शंकर पोखरेल, एकीकृत समाजवादीका महासचिव भुसाल पनि सहभागी थिए । भुसालले छलफलमा एमाले अध्यक्ष ओली पनि लचकताका साथ प्रस्तुत भएको बताए ।