- वि.सं २o८१ बैशाख २० बिहीबार
महानगरभित्रकै सडकको अवस्था अहिले पनि अस्तव्यस्त, ओलीको आगमनले राजनीतिमा नयाँ समीकरणको तरंग
घोषणापछि मिति सर्दै आएको भरतपुर भ्रमण वर्ष तेस्रो महिनामा आज (मार्च १) मा उद्घाटन हुँदै छ । भरतपुर महानगरपालिकाको आयोजनामा ‘घुमौँ भरतपुर’ भन्ने नारासहित हुन लागेको भरतपुर भ्रमण वर्ष २०२४ को नारायणी नदी–किनारमा औपचारिक रूपमा उद्घाटन गरिँदै छ ।
पाँच पूर्वप्रधानमन्त्री सहभागी हुने
उद्घाटन कार्यक्रममा प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डसहित पाँच पूर्वप्रधानमन्त्री सहभागी हुने महानगरपालिका प्रमुख रेनु दाहालले बताइन् । उनका अनुसार पूर्वप्रधानमन्त्री नेपाली कांग्रेसका सभापति शेरबहादुर देउवा, नेकपा समाजवादीका अध्यक्ष माधवकुमार नेपाल, झलनाथ खनाल, प्रमुख प्रतिपक्षी दल नेकपा एमालेका अध्यक्ष केपी शर्मा ओली र पूर्वप्रधानमन्त्री, पूर्वमन्त्रिपरिषद् अध्यक्ष खिलराज रेग्मी भरतपुर आउँदै छन् ।
भ्रमण वर्षको उद्घाटन कार्यक्रममा करिब ५० हजार उपस्थित हुने महानगरको अनुमान छ । भ्रमण वर्षमा पाँच लाख आन्तरिक र दुई लाख बाह्य पर्यटक भित्र्याउने लक्ष्य राखिएको छ । उद्घाटनअघि भरतपुरको चौबिसकोठीबाट नारायणी नदी–किनारसम्म विशाल र्याली निकालिँदै छ । महानगरका गन्तव्यहरूको राष्ट्रिय तथा अन्तर्राष्ट्रियस्तरमा प्रवर्द्धन गर्ने, पर्यटकको संख्या र बसाइँ अवधि वृद्धि गर्ने तथा दिगो पर्यटन विकासबाट आर्थिक समृद्धि प्राप्त गर्ने उद्देश्यले भ्रमण वर्ष आयोजना गरेको दाहाल बताउँछिन् । भ्रमण वर्षले यस आसपासका क्षेत्रहरूको आर्थिक तथा पर्यटन क्षेत्रलाई टेवा दिने अपेक्षा उनको छ ।
यसअघि ०८० साललाई भ्रमण वर्षका रूपमा मनाउने घोषणा गरेको महानगरले त्यतिवेला मुख्य राजमार्ग निर्माणाधीनको अवस्थामै रहेकाले सार्नुपरेको बताएको छ । भ्रमण वर्षका लागि लाखौँ रुपैयाँ खर्च गरिसकेको महानगरपालिकाले २०२४ को जनवरीमा पनि यही कारण देखाउँदै अन्तिम समयमा भ्रमण वर्षको कार्यक्रम रद्द गरेको थियो । महानगरको मुख्य बजार क्षेत्रको सडक अहिले पनि अस्तव्यस्त नै छ । सडकको काम नसक्दै महानगरपालिकाले भ्रमण वर्षको निरन्तरता दिएको देखिन्छ । भरतपुरको मुख्य सडक पुल्चोक–गोन्द्राङ सडक विस्तारका क्रममा छ भने नारायणगढ–बुटवल सडकको अवस्था अहिले पनि उस्तै छ ।
केपी ओलीको आगमनको सन्देश
यसअघि प्रधानमन्त्रीको हैसियतमा प्रमुख प्रतिपक्षी दल नेकपा एमालेका अध्यक्ष केपी ओली चितवनको सिटी हल र ६ लेनको सडक शिलान्यास गर्न आउँदा महानगर प्रमुख रेनु दाहाल सामान्य स्वागतमा पनि गएकी थिइनन् । ओलीको सरकार हुँदा भरतपुरमा बजेट नपारिएकोलगायतका आरोप लाग्ने गरेको थियो । तर, भरतपुर भ्रमण वर्षको उद्घाटनमा रेनु दाहालको निम्तो मानेर केपी ओली चितवन आउने पक्का गर्नुले राजनीतिक समीकरणमा केही परिवर्तनको आशय गरेको राजनीतिक विश्लेषकहरू बताउँछन् ।
भ्रमण वर्षमा के हेर्न आउने भरतपुरमा
सांस्कृतिक अनेकता, भौगोलिक विविधता, प्राकृतिक अवस्था, भूबनोट आदिका आधारमा महानगरले आफ्ना प्रमुख गन्तव्य छुट्याएको छ । चितवन राष्ट्रिय निकुञ्जदेखि दुई ठूला नदी राप्ती तथा नारायणीले दुईतिरबाट घेरिएको सुन्दर पर्यटकीय नगरी मेघौली, गोलाघाट, पटिहानी भरतपुरका प्रमुख पर्यटकीय क्षेत्र हुन् । त्रिशूली र कालीगण्डकीको संगमस्थल देवघाटदेखि मौलाकालिका मन्दिर, सामुदायिक वन, बीसहजार ताल, नारायणी बीचक्षेत्र, चौकीडाँडा, कविलासगढी, जगतपुर, राइनोकुञ्ज, बाटुली पोखरी, कसरालाई महानगरले भ्रमण वर्षको मुख्य स्थानका रूपमा प्रचार गर्दै पर्यटकीय गतिविधि सञ्चालन गरिरहेको छ । यहाँको मुख्य आकर्षण जंगल सफारी र जंगली जनावार बाघ, गैँडालगायतको अवलोकन हो ।
