- वि.सं २o८१ बैशाख २२ शनिबार
छैटौँ क्रमका ब्याट्सम्यान जान निकोल इटनको कम बलमा अन्तर्राष्ट्रिय टी–२० खेलमा शतकीय इनिङ्सको विश्व कीर्तिमान राखेको खेलमा नामिबियाले आयोजक नेपाललाई २० रनले हराएको छ ।त्रिकोणात्मक अन्तर्राष्ट्रिय टी–२० खेलमा नामिबियाले मंगलबार त्रिवि क्रिकेट मैदानमा पहिलो ब्याटिङ गरी २० ओभरमा चार विकेट गुमाएर दुई सय ६ रनको विशाल योगफल खडा गरेको थियो । प्रत्युत्तरमा नेपालले १८.५ ओभरमा सबै विकेटको क्षतिमा एक सय ८६ रनको योगफल बनाएको थियो । नेपाल लगातार नामिबियासँग तीन खेलमा पराजित भएको छ ।
३३ बलमा इटनको शतक
टस जितेर पहिलो ब्याटिङ गरेको नामिबिया एक समय ६२–३ को अवस्थामा थियो । नेपालले नामिबियालाई १० ओभरसम्म रोकेर राखेको थियो । तर, इटनले करिअरकै उत्कृष्ट इनिङ्स मात्र खेलेनन्, उनले टी–२० फम्र्याटमा कम बलमा शतकको विश्व कीर्तिमानसमेत पूरा गरे । उनले केवल ३३ बलमै शतक लगाए ।
इनिङ्सको १९.२ ओभरमा विकेट गुमाउनुअघि उनले ३६ बलमा ११ चौका र आठ छक्का प्रहार गरी १०१ रनको योगदान दिए । उनी आउट हुँदा नामिबिया निकै बलियो स्थितिमा पुगेको थियो । इटनले नेपालकै बायाँहाते खेलाडी कुशल मल्लले गत असोजमा १९औँ एसियन खेलकुद प्रतियोगितामा मंगोलियाविरुद्ध ३४ बलमा विश्व कीर्तिमानी रूपमा शतकीय इनिङ्स खेलेका थिए । २३ वर्षीया इटनले कुशलले राखेको रेकर्ड केवल १५३ दिन भित्रै तोड्न सफल भए ।
मध्यक्रमले दिलाएको आशा
विशाल लक्ष्य पछ्याउँदा नेपालको सुरुवात दयनीय भयो । इनिङ्सको पहिलो बलमै ओपनर कुशल भुर्तेल गोल्डेन डक आउट भए । उनलाई रुवेल ट्रम्पेलमेनले एलबिडब्लुको धरापमा राखेका थिए । दोस्रो ओपनर आसिफ शेख ६ रनमा आउट हुँदा नेपाल २.५ ओभरमा २०–२ को स्थितिमा रह्यो । त्यसपछि कप्तान रोहितले कुशल मल्लसँग तेस्रो विकेटका लागि ५० रनको साझेदारी गर्दै नेपाललाई ७.३ ओभरमा ७७–३ को स्थितिमा राखे । कीर्तिमान खेलाडी इटनले रोहितको विकेट लिए । रोहितले २४ बलमा समान तीन चौका र छक्का प्रहार गरी ४२ रन जोडे ।
त्यसपछि कुशलले दीपेन्द्रसिंह ऐरीसँग चौथो विकेटका लागि १४ रन जोडे । कुशलले २१ बलमा चार चौका र एक छक्काको सहयोगमा ३२ रन बनाए । नेपालले निरन्तर रूपमा विकेट गुमाइरहँदा आवश्यक रनरेट यथावत् राखेको थियो । सोमपाल कामीले ११ बलमा तीन छक्का र एक चौका प्रहार गरी २६ रन बटुल्दै नेपाललाई जितको आशा दिलाए । ट्रम्पलमेनले आफ्नो चौथो ओभरमा लगतार दुई विकेट लिँदा नेपाल नामिबियासँग २० रनले पराजित भयो । दीपेन्द्रसिंहले ३२ बलमा समान दुई चौका र छक्का प्रहार गरी सर्वाधिक ४८ रन बनाए । बलिङमा ट्रम्पेलमेनले २९ रन खर्चेर चार विकेट लिए ।
