खेलकुद प्रिन्ट संस्करण

गौतम बुद्ध क्रिकेट रंगशाला निर्माणको स्रोत सुनिश्चित

बागमती प्रदेश सरकारले चितवनमा निर्माणाधीन अवस्था रहेको गौतम बुद्ध अन्तर्राष्ट्रिय क्रिकेट रंगशालाको बाँकी काम सम्पन्न गर्न आवश्यक बजेटको स्रोत सुनिश्चितता गरेको छ । प्रदेश सरकारको मंगलबार बसेको मन्त्रिपरिषद् बैठकले रंगशाला निर्माणका लागि आवश्यक बजेटमध्ये ७० प्रतिशत व्यहोर्ने गरी स्रोत सुनिश्चितताको निर्णय गरेको मुख्यमन्त्री शालिकराम जम्कट्टेलले जानकारी दिएका छन् । मुख्यमन्त्री जम्कट्टेलका अनुसार प्रदेश सरकारले रंगशाला निर्माणका लागि ५२ करोड ५० लाख रुपैयाँको स्रोत सुनिश्चितता गरेको छ ।

गत २१ कात्तिकमा प्रदेश सरकार र भरतपुर महानगरपालिकाबीच रंगशाला निर्माणका लागि कुल ७५ करोड रुपैयाँको लागत अनुमानको ७० प्रतिशत प्रदेश सरकारले व्यहोर्ने सम्झौता भएको थियो । महानगरपालिकाले तयार पारेको पहिलो चरणको लागत अनुमानको प्रस्तावअनुसार १० हजार दर्शक अट्ने पारापिटसहित क्रिकेट पिच र मैदान निर्माणको काम गर्ने निर्णय भएको जम्कट्टेलले बताए । बैठकले भरतपुर महानगरपालिकालाई रंगशालाको निर्माण कार्यका लागि ठेक्का प्रक्रिया अघि बढाउन आग्रहसमेत गरेको छ । सोमबार मात्रै गौतमबुद्ध अन्तर्राष्ट्रिय क्रिकेट रंगशालाको बागमतीका आर्थिक मामिलामन्त्री बहादुरसिंह लामा र स्वास्थ्यमन्त्री उत्तम जोशीले निरीक्षण गरेका थिए । 

बागमती प्रदेशले राष्ट्रिय गौरवको आयोजनामा रहेको रंगशाला निर्माणका लागि ५२ करोड ५० लाख रुपैयाँ स्रोत सुनिश्चित गरेको छ

दुवै मन्त्रीले रंगशाला निर्माणका लागि प्रदेश सरकारले बजेट सुनिश्चित गर्ने आश्वासन दिएका थिए । रंगशाला निर्माणस्थल अवलोकनपछि अर्थमन्त्री लामाले देशकै गौरवको आयोजनाको रूपमा रहेको रंगशाला निर्माण सम्पन्न गर्नु प्रदेश सरकारको आफ्नो दायित्व बताएका थिए । गत पुसमा नेपाल सरकारको बैठकले रंगशालालाई राष्ट्रिय गौरवको आयोजनाका रूपमा राखेको थियो । 

जग्गा सम्झौतासँगै काम अगाडि बढ्ने
सरकारले लिज ऐनअन्तर्गत रंगशालाले जग्गा लिनुपर्ने भएकाले मन्त्रिपरिषद्को बैठकबाट सहमति लिएको थियो । त्रिभुवन विश्वविद्यालय र कृषि तथा वन विज्ञान विश्वविद्यालयसँग भरतपुर महानगरपालिकाले जग्गाको सम्झौता गरी रंगशालाको काम अघि बढाइँदै छ । भरतपुर महानगरपालिकाकी प्रमुख रेनु दाहालले रंगशालामा बजेट पार्ने विश्वास दिलाएकी छिन् । ‘रंगशाला निर्माणमा प्रदेश सरकारको चासो छ । हामी बजेट सुनिश्चित गरेरै अघि बढ्छौँ,’ उनले भनिन् । यसअघि धुर्मुस–सुन्तली फाउन्डेसनले १९ करोड रुपैयाँ ऋण लागेको भन्दै दुई वर्षअघि निर्माणको काम छाडेको थियो ।