समाचार प्रिन्ट संस्करण

कांग्रेसको मधेश प्रदेश सम्मेलनमा देउवाले भने–‘निर्वाचन प्रणालीका कारण कांग्रेसको बहुमत आएन’

कांग्रेस सभापति शेरबहादुर देउवाले जनताको बीचमा पार्टी लोकप्रिय भए पनि वर्तमान निर्वाचन प्रणालीका कारण बहुमत ल्याउन नसकेको बताएका छन् । समानुपातिक, समावेशी निर्वाचन प्रणालीका कारण कुनै पनि राजनीतिक दलको स्पष्ट बहुमत आउने सम्भावना नरहेको उनको भनाइ छ । तर, सोही कार्यक्रममा सहभागी महामन्त्री गगन थापाले भने जनताको चाहनाअनुसार राम्रो काम गरे यही प्रणालीमा पनि बहुमत प्राप्त गर्न सकिने बताएका छन् । 

कांग्रेस मधेश प्रदेशको प्रथम सम्मेलनको बिहीबार जनकपुरधाममा उद्घाटन गर्दै पूर्वप्रधानमन्त्री देउवाले कांग्रेस संसद्मा ठूलो दल भए पनि वर्तमान निर्वाचन प्रणालीका कारण बहुमत ल्याउन नसकेको बताए । कांग्रेस र मधेशबीचको सम्बन्ध सेतुका रूपमा रहेको बताउँदै सभापति देउवाले भने, ‘हामीले मधेशलाई विपन्न होइन, सम्पन्न मधेश बनाउन चाहेका छौँ । त्यसकारण मधेशमा कांग्रेसलाई बलियो बनाउन साथीहरूले आ–आफ्नो स्थानबाट जुट्नुपर्छ ।’ उनले कांग्रेस बलियो भए मात्रै संविधान र परिवर्तनको रक्षा हुने जिकिर गरे । दुई दिनसम्म चल्ने सम्मेलनमा आठ जिल्लाका आठ सय २५ प्रतिनिधि सहभागी रहेको मधेश प्रदेशका सभापति कृष्णप्रसाद यादवले जानकारी दिए । 

वरीयता विवादले कोइराला अनुपस्थित, निधिले आशनग्रहण गरेनन्
सम्मेलनको उद्घाटन सत्रमा अतिथिका रूपमा आमन्त्रण गरिए पनि नेता शेखर कोइराला उपस्थित भएनन् । १४औँ महाधिवेशनमा देउवासँग सभापति पदमा निर्वाचन लडेका कोइरालाको वरीयता विवाद कांग्रेसमा देखा पर्दै आएको छ । सोही विवादका कारण मधेश प्रदेशको पहिलो अधिवेशनमा कोइराला उपस्थित नभएको मधेशका केही नेताले बताए । 

कोइरालाको वरीयतालाई लिएर मधेश प्रदेश कार्यसमितिमा संस्थापन र इतर समूहबीच विवाद नै भएको थियो । इतर समूहले कोइरालालाई देउवापछिको सम्मान दिएर आशनग्रहण गराउनुपर्ने अडान राखेको थियो । बुधबार मधेश प्रदेश कार्यसमितिको बैठकमा पनि कोइराला समूहले जोडतोडले यो कुरा उठाएको थियो । तर, मधेश प्रदेश सभापति कृष्ण यादवसहित संस्थापन पक्षधर नेताहरूले अस्वीकार गरे । संस्थापन इतर समूहले कोइरालालाई उपसभापति पूर्णबहादुर खड्काभन्दा माथिको वरीयतामा राख्नुपर्ने अडान राखेका थिए । केही दिनअघिको बैठकमा त इतर समूहका आठ कार्यसमिति सदस्यले नोट अफ डिसेन्ट नै लेखेका थिए । 

उद्घाटन सत्रमा पूर्वउपसभापति विमलेन्द्र निधिले भने वरीयता नमिलाएको भन्दै मञ्चमा आसनग्रहण गरेनन् । मञ्चमा आसनग्रहणका लागि बोलाउँदा उनी अस्वीकार गरी दर्शकदीर्घामै बसे । मधेश सभापति यादवसहितले पटक–पटक मञ्चमा आउन निधिलाई आग्रह गरे पनि उनी दर्शकदीर्घामै बसिरहे । 

नेता इमानदार बने यही प्रणालीमा जनताले बहुमत दिन्छन् : थापा
कांग्रेस महामन्त्री गगन थापाले देशमा भष्टाचार, कुशासन बढिरहेकाले संघीयताविरुद्ध आवाज चर्को हुँदै गएको बताए । उनले माओवादी नेतृत्वपछि कांग्रेसको नेतृत्वमा बन्ने सरकारले विकृति र विसंगतिलाई हटाएर देशमा सुशासन कायम गर्ने दाबी गरे । सरकारको नेतृत्व माओवादी अध्यक्ष पुष्पकमल दाहाल प्रचण्डले गरिरहे पनि सग्रम देशको नेतृत्व कांग्रेसले गरिरहेको उल्लेख गर्दै महामन्त्री थापाले भने, ‘सातवटा प्रदेशमध्ये चारवटा प्रदेशमा कांग्रेस नेतृत्वको सरकार छ । तीन सयभन्दा बढी स्थानीय तहमा कांग्रेसको नेतृत्व छ । त्यसकारण हामीले इमानदारीपूर्वक काम गरिदियो भने ०८४ मा जनताले यही निर्वाचन प्रणालीमा पनि कांग्रेसलाई बहुमत दिन्छन् ।’