धनगढी स्पोर्टस् क्लब लिटल फ्लावर प्रिमियर लिग (एलपिएल)को सेमिफाइनल प्रवेश गरेको छ । धनगढीलाई अन्तिम चारमा पुर्याउन बायाँहाते स्पिनर भुवन कार्कीले असाधारण बलिङ प्रदर्शन गरेका थिए । उनले कीर्तिमानी रूपमा आठ विकेट लिए । यस क्रममा उनले चार ओभरमा १८ रन मात्र खर्चेका थिए । उत्कृष्ट बलिङ प्रदर्शन गरेका भुवन म्यान अफ दी म्याच भए । भुवनको जादुमयी बलिङ प्रदर्शन भएको खेलमा धनगढीले खप्तड इन्डोर स्पोर्टस् ट्रेनिङ सेन्टरलाई ६७ रनले पराजित गर्यो ।
फाप्ला क्रिकेट मैदानमा धनगढी स्पोर्टस् क्लबले दिएको १६४ रनको लक्ष्य पछ्याएको खप्तड इन्डोरले १९.३ ओभरमा ९६ रन बनाउँदै सबै विकेट गुमायो । खप्तड इनिङको एक समय ७९–१ को बलियो अवस्थामा थियो । तर, थप १७ रन जोड्दा खप्तड स्पोर्टस्ले सम्पूर्ण विकेट गुमायो । भुवनले इनिङ्सको १५औँ ओभरमा तीन विकेट तथा १७औँ ओभरमा चार विकेट लिएका थिए ।
उनले दुवै ओभरमा लगातार दुई विकेट लिए पनि ह्याट्रिक विकेट लिन सकेनन् । उनले तीन ब्याट्सम्यानलाई बोल्ड तथा पाँच ब्याट्सम्यानलाई क्याच आउट पारे । धनगढीका अर्का स्पिनर सुनील धमलाले २ विकेट लिए । खप्तड इन्डोर स्पोर्टस्को ब्याटिङमा अभिषेक थापाले सर्वाधिक ४२ तथा प्रकाश पाण्डेले ३० रन बनाए । खप्तडका अन्य ब्याट्सम्यानले दोहोरो रन जोड्न सकेनन् ।
धमलाको अर्धशतक
यसअघि टस हारेर ब्याटिङ गरेको धनगढी क्लबले २० ओभरमा ५ विकेट गुमाएर १६३ रन बनायो । धनगढी स्पोर्टस्का लागि ओपनर सुनील धमलाले अर्धशतकीय योगदान दिए । धमलाले ५० बलमा ५ चौका र २ छक्का प्रहार गरे । कप्तान भुवन कार्कीले ३६, प्रनीत थापाले २६ तथा अमरसिंह रौटेलाले अविजित १२ रनको योगदान दिए । धमलाले दोस्रो विकेटका लागि भुवन कार्कीसँग ८४ रनको साझेदारी गरेका थिए । धमलाले तेस्रो विकेटका लागि प्रनीत थापासँग ५४ रनको साझेदारी गरे । खप्तड इन्डोरको बलिङमा रवि विष्ट र आर्यन विष्टले समान दुई विकेट हात पारे ।
युथ अफ टीकापुर, घोडाघोडी क्रिकेट एकेडमी र सत्यवती एकेडेमी सेमिफाइनल प्रवेश गरिसकेका छन् । लिटल फ्लावर स्पोर्टस् क्लबको आयोजनामा भइरहेको प्रतियोगिताको उपाधि विजेताले दुई लाख ५५ हजार र उपविजेताले एक लाख २८ हजार पुरस्कार पाउनेछन् ।