हिमाली जिल्ला मनाङ जोड्ने एक मात्र बेँसीसहर–चामे सडक सञ्चालनमा आएको छ । बाढीपहिरोका कारण आइतबार बिहानदेखि अवरुद्ध बेँसीसहर–चामे सडक सोमबार दिउँसोदेखि सञ्चालनमा आएको हो ।
बेँसीसहर नगरपालिका– ६ खरखरे भिरमा गएको पहिरो हटाएसँगै सोमबारदेखि सवारीसाधन सञ्चालनमा आएको डुम्रे–बेँसीसहर–चामे सडक योजना कार्यालय लमजुङले जनाएको छ ।
खरखरेमा पानी र ठूलाठूला ढुंगासहितको पहिरो आएको र डोजरले खोतल्दा झन् पहिरो जान थालेपछि सडक खुलाउन सकिएको थिएन । तर, सोमबार बिहान पानी रोकिएपछि सडक खुलाइएको कार्यालयका इन्जिनियर पुरुषोत्तम अधिकारीले बताए ।
बाटो खुले पनि पहिरोको जोखिम भने कायमै छ । लमजुङ र मनाङ जोड्ने एक मात्र सडक अवरुद्ध हुँदा उत्तरी लमजुङ र मनाङवासी बढी मर्कामा पर्दै आएका छन्।