खेलकुद प्रिन्ट संस्करण

फिफा महिला विश्वकप, फ्रान्सले ब्राजिललाई हरायो

इटलीलाई हराउँदै स्विडेनले फिफा महिला विश्वकपको अन्तिम १६ स्थान पक्का गर्दा ब्राजिल भने फ्रान्ससँग पराजित 

वेन्डी रेनार्डले विजयी गोल गरेपछि फ्रान्सले फिफा महिला विश्वकपमा ब्राजिलमाथि २–१ को रोमाञ्चक जित निकालेको छ । शनिबार अस्ट्रेलियाको ब्रिसबेनमा जित निकालेसँगै फ्रान्स समूह ‘एफ’को शीर्ष स्थानमा उक्लिन सफल भयो । दुई खेलबाट जमैकाको पनि चार अंक छ । यद्यपि, गोलअन्तरमा फ्रान्स माथि छ । ब्राजिलको तीन अंक रहँदा पानामा भने अंकविहीन छ । पहिलो खेलमा ब्राजिलले पानामालाई ४–० ले हराएको थियो भने फ्रान्सले जमैकासँग गोलरहित बराबरी खेलेको हो । अब अन्तिम दिन ब्राजिलले जमैका र फ्रान्सले पानामासँग खेल्नेछ । ब्राजिलले अन्तिम खेलमा जमैकालाई हराए मात्रै नकआउटमा स्थान बनाउनेछ । 

जितपछि फ्रान्सका प्रशिक्षक हार्भे रेनाल्डले ब्राजिल बलियो टोली भए पनि आत्मविश्वास हुँदा जित निकालेको प्रतिक्रिया दिएका छन् । ‘ब्राजिल बलियो टोली हो । तर, हामीसँग जितको आत्मविश्वास थियो,’ रेनाल्डले भने । ‘अनुभवी ब्राजिलविरुद्ध जितका लागि खेलाडीलाई धन्यवाद दिनुपर्छ,’ उनले भने । ब्राजिलका प्रशिक्षक विआ सुन्धागेले पहिलो हाफमा खेलाडीले राम्रो खेल्न नसकेको बताएका छन् । उनी जमैकाविरुद्ध उत्कृष्ट प्रदर्शन गर्दै जित निकाल्नेमा विश्वस्त रहे ।

सनक्रप रंगशालामा फ्रान्सलाई जित दिलाउन युजेनी ली सोमर र वेन्डी रेनार्डले समान एक गोल गरेका थिए । ब्राजिलका लागि डेबिन्हाले एक गोल फर्काइन् । पहिलो हाफमा फ्रान्सले १–० को अग्रता लिएको थियो । १७औँ मिनेटमा सोमरले गोल गर्दै अग्रता बनाइन् । डेबिन्होले ५८औँ मिनेटमा गोल गर्दा खेल १–१ को स्थितिमा रह्यो । रेनार्डले ८३औँ मिनेटमा विजयी गोल गरेकी थिइन् । 

स्विडेन नकआउट चरणमा 
लगातार दोस्रो जित निकाल्दै स्विडेन फिफा महिला विश्वकपको अन्तिम १६ मा प्रवेश गरेको छ । दोस्रो खेलमा स्विडेनले इटलीमाथि ५–० को सहज जित निकाल्यो । लगातार दोस्रो जितसँगै दुई खेलबाट ६ अंक जोडेको स्विडेन समूह ‘जी’को शीर्ष स्थानमा छ । पहिलो हार व्यहोरेको इटली तीन अंकका साथ दोस्रो स्थानमा छ । न्युजिल्यान्डको वालिङटन क्षेत्रीय रंगशालमा स्विडेनलाई जित दिलाउन अमान्डा इलेस्टेडटले दुई तथा फ्रिडोलिना रोल्फो, स्टिना ब्ल्याकस्टेनियस र रेबेका ब्लोमक्विस्टले समान एक गोल गरेका थिए ।

जमैकाको पहिलो जित
पानामालाई १–० ले हराउँदै जमैकाले फिफा महिला विश्वकपमा ऐतिहासिक जित निकालेको छ । अस्ट्रेलियाको पर्थमा जमैकालाई जित दिलाउन कप्तान एलिसन स्वाबीले गरेको एक मात्र गोल निर्णायक बनेको थियो । स्वाबीले खेलको ५६औँ मिनेटमा कार्टरको कर्नरलाई हेडमार्फत गोल गरेकी थिइन् । विश्वकपमा जमैकाको यो पहिलो जित हो । जमैकन कप्तान स्वाबीले जितपछि धेरै खुसी भएको बताउँदै आफ्ना सहकर्मीप्रति गर्व भएको बताइन् । ‘म निकै खुसी छु । साथीहरूले धेरै मिहिनेत गरे । यो गर्वको कुरा हो । हामी अझै राम्रो गर्न सक्छौँ,’ 
उनले भनिन् ।