- वि.सं २o८१ बैशाख २२ शनिबार
लुम्बिनी प्रदेश सभाले विनियोजन विधेयक पारित गरेको छ । प्रदेशका अर्थमन्त्री धनबहादुर मास्कीले प्रस्तुत गरेको आर्थिक वर्ष ०८०/८१ को सेवा र कार्यको लागि लुम्बिनी प्रदेश, प्रदेश सञ्चिति कोषबाट केही रकम खर्च गर्ने र विनियोजन गर्ने सम्बन्धमा व्यवस्था गर्न बनेको विधेयक बहुमतले पारित गरेको हो ।
बुधबार बसेको दोस्रो अधिवेशनको १७औँ बैठकले उक्त विधेयक पारित गरेसँगै ‘प्रदेश विनियोजन ऐन ०८०’ नामाकरण गरिएको छ । यसअघिका बैठकमा प्रतिपक्ष दल एमालेका सांसदहरूले अवरोध गरेपछि छलफल हुन सकेको थिएन ।
मंगलबार साँझ सभामुखको रोहबरमा मुख्यमन्त्री डिल्ली चौधरी, अर्थमन्त्री धनबहादुर मास्कीसहित प्रतिपक्ष दलका नेताहरूसँग छलफल भएपछि बुधबार बैठक सहज रूपमा चलेको थियो ।
मुख्यमन्त्री चौधरीले प्रतिपक्ष दलका नेताको मागमा गम्भीर रहेको भन्दै सभालाई सम्बोधन गरेपछि प्रतिपक्ष दलका सांसदहरूले सभालाई सहज रूपमा सञ्चालन गर्न दिएका हुन् । यसअघि प्रदेश सभाले राजस्व र व्ययको अनुमान पारित गरेको थियो ।
आजै अर्थमन्त्री मास्कीले ‘प्रदेश सरकारको अर्थसम्बन्धी प्रस्तावलाई कार्यान्वयन गर्न बनेको विधेयक’ पेस गरेका छन् । सोही विधेयकमाथि आजै साँझ साढे ७ बजेदेखि छलफल हुनेछ ।
