नेपालले एसिसी यू–१६ इस्ट जोन कप क्रिकेट प्रतियोगितामा उपाधिमाथि ह्याट्रिक गरेको छ । मलेसियाको बायुमास क्रिकेट मैदानमा मंगलबार भएको फाइनलमा नेपालले आयोजकलाई दुई सय २१ रनको फराकिलो अन्तरले हराउँदै लगातार तेस्रोपटक उपाधि हात पारेको हो । नेपालले सन् २०१७ र २०१९ मा पनि ट्रफी उचालेको थियो । अघिल्ला दुई संस्करणमा एसियन क्रिकेट काउन्सिल (एसिसी) ले प्रतियोगिताको नाम यू–१६ इस्टर्न रिजन राखेको थियो । यसैपटकबाट यू–१६ इस्ट जोन कप नामकरण भएको हो ।
बायुमास मैदानमा पहिलो ब्याटिङ गरेको नेपालले ३५ ओभरमा आठ विकेट गुमाउँदै दुई सय ५२ रनको विशाल योगफल खडा गरेको थियो । प्रत्युत्तरमा मलेसिया १४.५ ओभरमा ३१ रनमै समेटिँदा नेपाल फराकिलो अन्तरले विजयी भएको हो । नेपाली युवा खेलाडीले मलेसियाविरुद्ध ब्याटिङ र बलिङमा उत्कृष्ट प्रदर्शन गरेका थिए । ब्याटिङका क्रममा नरेन भट्टले शतक तथा बलिङमा अभिषेक तिवारीले पाँच विकेटको प्रदर्शन गरे ।
नरेनको सानदार शतक
ब्याटिङ पिचमा तेस्रो क्रमका ब्याट्सम्यान नरेनले शतकीय इनिङ्स खेल्दा नेपालले प्रतिओभर ७ रनरेटमा रन बटुलेको थियो । नरेनले केवल ८९ बलमा एक सय १२ रनको योगदान गरे । उनले १० चौका र दुई छक्का प्रहार गरे । इनिङ्सको अन्तिमसम्म नटआउट रहेका नरेनलाई सन्तोष यादव र अशोक धामीले गतिलो साथ दिएका थिए । नरेनले नीरजकुमार यादवसँग दोस्रो विकेटका लागि ५५ बलमा ५५ रनको साझेदारी गरे ।
नरेनले पाँचौँ विकेटका लागि सन्तोष यादवसँग १०३ रनको साझेदारी गर्न सफल भए । सन्तोष र नरेनबीच ७६ बलसम्म साझेदारी भएको थियो । यी दुवै ब्याट्सम्यानले नेपाललाई ११२–४ बाट २१६–५ को बलियो स्थितिमा पुर्याए । त्यसपछि नरेनले अशोकसँग साँतौँ विकेटका लागि १३ बलमा २५ रन जोडे । सन्तोषले २९ बलमा दुई चौका प्रहार गरी २६ रन बनाए । अशोकले ७ बलमा एक छक्का प्रहार गरी ११ रन जोडे । नेपालको ब्याटिङमा नीरजकुमार यादवले ४७ रन जोडेका थिए ।
अभिषेकले लिए पाँच विकेट
विशाल लक्ष्य पछ्याएको मलेसियाले नेपालका युवा फास्ट बलर अभिषेकको घातक बलिङ सामना गर्न सकेनन् । अभिषेकले ६ ओभरमा केवल सात रन खर्चेर पाँच विकेट हात पारे । उनले आफ्नो स्पेलमा एक मेडन राखेका थिए । उनले प्रतिओभर १.१७ रनरेटमा बलिङ गरेका थिए । अभिषेकले मलेसियाका शीर्ष चार ब्याट्सम्यानलाई पेभेलियन फर्काए । अभिषेकको बलिङअगाडि टिक्न नसकेका मुहमद ०, मुहमद आलिफ २, हमजाह पान्गी ० र मोहमद हैरिलले ४ रन बनाए । अभिषेकले इनिङ्सको ०.१ र ०.५ ओभरमा विकेट लिएका थिए ।
मलेसियाले पाँच विकेट गुमाउँदा स्कोर बोर्डमा १८ रन मात्र जोडेको थियो । त्यसवेला ७.६ ओभर चलिरहेको थियो । मलेसियाले थप पाँच विकेट १३ रनभित्र गुमाएको थियो । मलेसियाको ब्याटिङमा पाँचजनाले रन नै बनाएनन् । मलेसियाका लागि मुहमद अक्रमले सर्वाधिक १० रन जोडे । घरेलु टोलीको ब्याटिङमा एक मात्र छक्का अक्रमले नै प्रहार गरेका थिए । नेपालका लागि सन्तोष यादवले तीन ओभरमा नौ रन खर्चंदै तीन विकेट लिए । उनले आफ्नो स्पेलमा दुई मेडन राखेका थिए । अशोकले ०.५ ओभर बलिङ गरी एक रन खर्चंदै एक विकेट हात पारे ।