समाचार डिजिटल संस्करण

बजेट कटौतीपछि १४६ कर्मचारी हटाउने मदन भण्डारी स्वास्थ्य विज्ञान प्रतिष्ठानको निर्णय

बागमती प्रदेशको राजधानीमा रहेको मदन भण्डारी स्वास्थ्य विज्ञान प्रतिष्ठानले आर्थिक संकटको कारण देखाउँदै १४६ जना कर्मचारी कटौती गर्ने निर्णय गरेको गरेको छ । 

प्रतिष्ठानका उपकुलपति विश्वराज जोशीको अध्यक्षतामा आइतबार बसेको बैठकले कर्मचारी कटौती गर्ने निर्णय गरेको हो । 

आगामी आर्थिक वर्षमा प्रतिष्ठानका लागि कम बजेट आउने भएपछि बजेट अभावका कारण देखाउँदै प्रतिष्ठानले कर्मचारी कटौतीको घोषणा गरेको हो । प्रतिष्ठानले आगामी आर्थिक वर्षमा तलब भत्ता वितरणमै समस्या हुने भएपछि कर्मचारी हटाउनु परेको दावी गरेको छ । 

प्रतिष्ठानका रजिष्ट्रार एवं हेटौंडा अस्पताल विकास समितिका अध्यक्ष राजेश प्रसाईले चालु आर्थिक वर्षमा हेटौँडा अस्पतालका लागि नियुक्त गरिएकामध्ये १४६ जना प्रशासनिक र प्राविधिक कर्मचारी कटौती गर्ने निर्णय भएको जानकारी दिए ।

‘प्रतिष्ठानका लागि संघीय सरकार र प्रदेश सरकारले चालु आर्थिक वर्षको तुलनमा कम बजेट विनियोजन गरेकाले अस्पताल तर्फका कर्मचारीलाई के गर्ने भन्ने कुरामा समस्या भएपछि तलब नै खुवाउन नसक्ने भएपछि हटाउने निर्णय गरेका हौँ,’ उनले भने । 

ती कर्मचारीको व्यवस्थापनको जिम्मेवारी र कर्मचारीलाई तलब भत्ता वितरणमा नै समस्या हुने भएपछि आउँदो १ साउनदेखि लागु हुने गरी करार सम्झौता खारेज गर्नुपरेको प्रतिष्ठानका प्रमुख प्रशासकीय अधिकृत अमरसिंह अधिकारीले जानकारी दिए ।

अधिकृत अधिकारीले प्रदेश सरकाले चालु आर्थिक वर्षको तुलनामा आगामी आर्थिक वर्षका लागि प्रतिष्ठानको सात करोड १९ लाख रुपैयाँ बजेट कटौती गरेको जानकारी दिए । अधिकारीका अनुसार प्रदेश सरकारले आगामी आर्थिक वर्षमा प्रतिष्ठानका लागि १२ करोड ३२ लाख रुपैयाँ बजेट विनियोजन गरेको छ ।