नेपाल कृषि सहकारी केन्द्रीय संघ लिमिटेड तथा सानिमा रिलायन्स लाइफ इन्स्योरेन्स लिमिटेडबीच बिमासम्बन्धी सम्झौता भएको छ । देशभरका कृषि सहकारी केन्द्रीय संघको सदस्यताप्राप्त कृषि तथा साना किसान कृषि सहकारी संस्थाका विपन्न तथा साना किसान सदस्यलाई म्यादी जीवन बिमा सेवा प्रदान गर्ने सम्झौता भएको हो ।
यो एक प्रकारको लागत प्रभावी जीवन बिमा रहेको कम्पनीको भनाइ छ । योजनाअन्तर्गत बिमितको मृत्यु भएमा बिमांकबराबर रकम प्रदान गरिने कम्पनीले जनाएको छ ।
संघले आफ्नो स्थापनाकालदेखि नै ग्रामीण गरिबी न्यूनीकरण र समावेशीकरणका लागि आफ्ना सदस्यहरूको क्षमता वृद्धि गरी असल अभ्यासका साथ सामाजिक पुँजीको विकास गर्न उत्पे्ररणा गर्ने भूमिका निर्वाह गर्दै आएको जनाएको छ । हाल संघबाट नेपालका ७७ वटै जिल्लाका एक हजार दुई सयभन्दा बढी संस्थाहरूमा आबद्ध १२ लाखभन्दा बढी साना किसान परिवारहरूले सेवा लिइरहेको जनाइएको छ ।