- वि.सं २o८१ बैशाख २० बिहीबार
कवि तथा गीतकार वसन्त चौधरीले आफ्नी नातिनी आहाना शाक्य (चौधरी)को जन्मदिनको अवसरमा बालकवितासंग्रह ‘आहाना’ सार्वजनिक गरेका छन् । आइतबार ललितपुरको खुमलटारस्थित प्रिमियर इन्टरनेसनल स्कुलको सभाहलमा आयोजित एक समारोहका बीच कवि चौधरीले लेखेको बालकवितासंग्रह ‘आहाना’ विमोचन गरिएको हो ।
कवि चौधरीले आफ्नो साहित्यिक जीवनकै पहिलो बालकवितासंग्रह प्रकाशन गरेका हुन् । यसअघि उनका कविता तथा गीतहरूका २० वटाभन्दा बढी संग्रह प्रकाशित भइसकेका छन् ।
कवि चौधरी, उनकी पुत्री मेघा चौधरी, नातिनी आहाना शाक्य (चौधरी) तथा आहानाका पिता पारस शाक्य र बालबालिकाले बालकवितासंग्रह ‘आहाना’को सामूहिक लोकार्पण गरेका थिए । बालकवितासंग्रह नेपाली र अंग्रेजी दुवै भाषामा उपलब्ध छ । ‘कोपिला किताब’ले प्रकाशन गरेको आहानामा चौधरीका ५६ वटा बालकविता समेटिएका छन् ।
कवितासंग्रह विमोचन समारोहमा बोल्दै कवि वसन्त चौधरीले आफू निकै खुसी भएको उल्लेख गर्दै भने, ‘यस्तो लागिरहेछ कि वसन्तको आगमन फेरि भएको छ । मन प्रफूल्लित छ ।’
