- वि.सं २o७९ चैत ३ शुक्रबार
राष्ट्रपति रामचन्द्र पौडेललाई भारतीय राष्ट्रपति द्रौपदी मुर्मूले आज टेलिफोन गरेर बधाई दिएकी छन् ।
गत सोमबार शपथग्रहण गरेलगत्तै बधाई चिठी पठाएकी राष्ट्रपति मुर्मूले आज साँझ भारतको केरलाबाट पौडेललाई टेलिफोन गरी बधाई दिएकी हुन् । त्यसक्रममा उनले दुई देशको बहुआयामिक सम्बन्ध थप सुदृढ हुने विश्वास व्यक्त गरेकी छन् ।
भारतको राष्ट्रपति कार्यालयद्वारा जारी विज्ञप्तिअनुसार टेलिफोन सम्वादमा दुवै राष्ट्रपतिले नेपाल र भारतबीच अनुपम र बहुआयामिक सम्बन्ध रहेको उल्लेख गर्दै द्विपक्षीय सहयोग थप सुदृढ बनाउने विश्वास व्यक्त गरेका छन् ।
उनीहरूले दुई देशका जनताबीचको मित्रताको बलियो साझेदारी थप सुदृढ गर्ने उपायबारे पनि छलफल गरेको राष्ट्रपतिको कार्यालयले जनाएको छ ।
राष्ट्रपति पौडेलको नेतृत्वमा भारत–नेपाल द्विपक्षीय सम्बन्ध थप उचाइमा पुग्ने विश्वास भारतीय समकक्षी मुर्मूले व्यक्त गरेकी छन् । पौडेल राष्ट्रपतिको कार्यभार सम्हालेपछि पहिलोपटक विदेशी समकक्षीसँग टेलिफोन संवाद भएको हो ।
