दुईपटकको विजेता त्रिभुवन आर्मी फुटबल क्लब पाँचौँ मकवानपुर गोल्डकप फुटबल प्रतियोगिताबाट बाहिरिएको छ । प्रतियोगिताको बिहीबार सम्पन्न क्वार्टफाइनलमा एपिएफसँग टाइब्रेकरमा पराजित हुँदै आर्मी प्रतियोगिताबाट बाहिरिएको हो । निर्धारित समय गोलरहित बराबरी भएपछि खेल टाइब्रेकरमा पुगेको थियो ।
टाइब्रेकरमा एपिएफका गोलरक्षक राजु नगरकोटी नायक बने । उनले आर्मीका दुईवटा प्रहारलाई रोक्दै आफ्नो टोलीलाई अन्तिम चारमा पुर्याएका हुन् । नगरकोटीले आर्मीका कप्तान नवयुग श्रेष्ठ र दीपक गुरुङको प्रहार रोकेका थिए । आर्मीका टेकबहादुर बुढाथोकी र विकास खवासको प्रहार गोल भएको थियो । टाइब्रेकरमा एपिएफका नवीन लामा, सुदीप शिख्राकार,
दिपेश घिमाल र सनिश श्रेष्ठले गोल गरेकाथिए । निर्धारित ९० मिनेटको खेलमा दुवै टोलीले राम्रो मौका गुमाएका थिए ।
खेलको म्यान अफ दी म्याच एपिएफका गोलरक्षक राजु नगरकोटी हुँदै १० हजार रुपैयाँ प्राप्त गरे । मकवानपुर जिल्ला फुटबल संघको आयोजनामा भएको खेलमा शुक्रबार घरेलु टोली मकवानपुर ११ ले मनाङ मस्र्याङ्दी क्लबसँग खेल्नेछ । १० फागुनसम्म सञ्चालन हुने प्रतियोगिताको विजेताले १५ लाख र उपविजेताले १० लाख रुपैयाँ प्राप्त गर्नेछन् । यस्तै, प्रतियोगिताको सर्वोत्कृष्ट खेलाडीले रोयल इन्फिल्ड बुलेट बाइक पाउनेछन् । विधागत उत्कृष्ट खेलाडी तथा प्रशिक्षकले जनही २५ हजार रुपैयाँ हात पार्नेछन् ।