पुरातात्विक एवं सांस्कृतिक सम्पदाको धनी ललितपुरमा विदेशी पर्यटकहरुको संख्या बढाउने र पर्यटकमैत्री वातवरण निर्माण गर्ने विषयमा ललितपुर महानगरपालिकाका मेयर चिरिबाबु महर्जन र न्यूयोर्कका नवनियुक्त पर्यटन प्रवर्द्धक गोकुल श्रेष्ठबीच छलफल भएको छ ।
न्यूयोर्कमा भएको भेटमा मेयर महर्जन र पर्यटन प्रवर्द्धक श्रेष्ठले पर्यटन क्षेत्रमा गर्न सकिने सहकार्यबारे छलफल गरेका हुन् ।
भेटवार्तामा मेयर महर्जनले ललितपुर महानगरपालिकालाई पर्यटक मैत्री सहरको रुपमा विकास गरिएको र थप गन्तव्यहरु पहिल्याउने काम तीब्र बनाइएको बताएका थिए । दुईपक्षीय भेटमा प्रवर्द्धक श्रेष्ठले पर्यटकका लागि आवश्यक सूचना र सडक सुरक्षाका विषयमा चासो राखेका थिए ।
महानगरपालिकाले नेपाल अवतरण गर्ने हरेर विमानमा ललितपुर महानगरपालिकाका पर्यटकीय क्षेत्रका बारेमा जानकारी दिने पुस्तिका राख्ने प्रक्रिया थालिएको जानकारी दिए । उनले सडकलाई सुरक्षित बनाउन महानगरले विभिन्न योजनाहरु अघि बढाएको बताए ।
पुरातात्विक क्षेत्र, कला र संस्कृतिका धरोहरहरुको पुनर्निर्माण र संरक्षणमा शुन्य सहनशीलता अपनाइएको भन्दै अन्तर्राष्ट्रिय क्षेत्रमा व्यापक प्रचारप्रसारको खाँचो रहेको बताए । नवनियुक्त श्रेष्ठले यसका लागि आफूले सक्दो प्रयास गर्ने आश्वासन दिए ।
नवनियुक्त श्रेष्ठलाई बधाई दिँदै मेयर महर्जनले पर्यटन मन्त्रालय र पर्यटन बोर्डमार्फत सहकार्य गर्न आफूहरु सधैँ तयार रहेको पनि बताए । मेयर महर्जन विश्व बैंकले आयोजना गरेको यातायात व्यवस्थापनसम्बन्धी कार्यक्रममा सहभागी हुन अमेरिका आएका हुन् ।
संसारभरका मेयरहरुको प्रतिनिधित्व रहेको कार्यक्रममा मेयर महर्जनले नेपालको प्रतिनिधित्व गरेका हुन् ।
