सत्तागठबन्धनको बिहीबार बसेको बैठकले नागरिकता विधेयकप्रति असन्तुष्ट राष्ट्रपति विद्या भण्डारीले गरेका शृंखलाबद्ध भेट र छलफल अस्वाभाविक रहेको निष्कर्ष निकालेको छ ।
बैठकमा प्रधानमन्त्री तथा कांग्रेस सभापति शेरबहादुर देउवाले राष्ट्रपतिले क्षेत्राधिकारबाहिर गएर छलफल गरेको बताएका थिए । ‘पूर्वसैनिक अधिकारीहरूलाई बोलाएर राजनीतिक छलफल गर्ने विषय राष्ट्रपतिको क्षेत्राधिकारको कुरा होइन,’ बैठकमा उनको भनाइ थियो ।
त्यस्तै, माओवादी अध्यक्ष प्रचण्डले सेरेमोनियल राष्ट्रपतिले राजनीतिक गतिविधि गर्नु जायज नभएको बताएका थिए । ‘पूर्वजर्नेलहरूलाई भेटेर सेरेमोनियल राष्ट्रपतिले राजनीतिक विषयमा छलफल गर्नु जायज होइन,’ उनको भनाइ थियो ।
एकीकृत समाजवादीका अध्यक्ष माधव नेपालले पनि बिहीबार पार्टी पुनर्गठन दिवसको कार्यक्रममा राष्ट्रपतिको भूमिकालाई लिएर शंका उत्पन्न गराएको बताए । बुधबार शीतलनिवासमा सेनाका सात दर्जन पूर्वजर्नेलसँग राष्ट्रपति भण्डारीले रात्रिभोजसहित परामर्श गरेकी थिइन् ।