महानगर परिसरमा बालेनविरुद्ध नाराबाजी
फुटपाथ व्यापारीको प्रदर्शन, तीनबुँदे माग सम्बोधन नगरे एक सातापछि कडा आन्दोलन गर्ने चेतावनी
काठमाडौंका फुटपाथमा बसेर व्यवसाय गर्दै आएका व्यापारीहरूले आज काठमाडौं महानगरपालिकाको कार्यालयमा नाराबाजी गरेका छन् । फुटपाथ व्यवस्थापनको नाममा महानगरले साना व्यापारीको रोजीरोटी खोसेको भन्दै उनीहरूले प्रदर्शनमा उत्रिएका हुन् ।
महानगर प्रमुख बालेन्द्र साहलाई भेटेर ज्ञापनपत्र बुझाउन गएको, तर मेयरले भेट्न नचाहेको भन्दै नाराबाजी गरेको बताएका छन् । उनीहरूले रोजगारीको ग्यारेन्टी गर, फुटपाथ व्यवसायीको व्यवस्थापन गर, गाँसवासको ग्यारेन्टी गर, नगर प्रहरीको अत्याचार बन्द गर, बाँच्न पाउने अधिकार सुनिश्चित गर भन्दै नाराबाजी गरेका थिए ।
आन्दोलित व्यापारीहरूले सडक स्वरोजगार श्रमिकलार्य मापदण्ड बनाई व्यवस्थापन गर्नुपर्ने, सडक किनारमा स्वरोजगार गरिरहेका श्रमिकको अभिलेखीकरण गरी परिचयपत्र दिनुपर्ने र प्रशासनकोतर्फबाट भइरहेका अमानवीय व्यवहार बन्द गरी यसअघि सरकारसँग भएको सम्झौता कार्यान्वयन गर्नुपर्ने तीनवटा माग राखेका छन् ।
पछिल्लो समय महानगरले सडक फुटपाथबाट व्यापारी हटाउन थालेपछि उनीहरू संगठित भएका छन् । स्वतन्त्र राष्ट्रवादी स्वरोजगार श्रमिक संघर्ष समितिको नाममा संगठित भएका उनीहरू ज्ञापनपत्र बुझाउन गएका थिए । उनीहरूको ज्ञापनपत्रमा एक हप्ताभित्र आफ्ना तीनबुँदे माग सम्बोधन नगरे कडा आन्दोलन गर्ने चेतावनी दिएका छन् ।