Skip This
कांग्रेस सिन्धुपाल्चोक सभापतिमा संस्थापन पक्षका जंगबहादुर तामाङ विजयी भएका छन् । उनले कोइराला पक्षका वंशलाल तामाङलाई पराजित गरेका हुन् । जंगबहादुरले दोस्रो चरणको निर्वाचनमा खसेको १७ सय ८७ मध्ये नौ सय १२ मत प्राप्त गरे ।
प्रतिद्वन्द्वी वंशलालले आठ सय ४८ मत ल्याए । पहिलो चरणमा तेस्रो भएका संस्थापन पक्षका डा. प्रेमध्वज लामाले दोस्रो भएका वंशलाललाई समर्थन गरे पनि दुई उम्मेदवारको मत योगलाई पछि पारेर जंगबहादुरले जित निकालेका हुन् ।
लामो समयदेखि संस्थापन पक्षका लामाले चुनाव लड्न त्रिभुवन विश्वविद्यालयको उपप्राध्यापकबाट राजीनामा दिएका थिए । अन्तिम समयमा केन्द्रीय सदस्य मोहनबहादुर बस्नेतले जंगबहादुरलाई टिकट दिएपछि लामा बागी उम्मेदवार उठेका थिए ।
पहिलो चरणको मतपरिणाम आएसँगै पत्रकार सम्मेलन गरेर उनले वंशलाललाई समर्थन गर्ने घोषणा गरेका थिए । ‘पार्टीलाई अब्बल बनाउने उद्देश्यले गर्दै आएको पेसा नै त्यागेँ । तर, केन्द्रीय सदस्य बस्नेतले धोका दिनुभो । त्यसैले विद्रोह गरेर कोइराला पक्षका वंशलाललाई समर्थन गरेको हुँ,’ उनले भने । दुई उपसभापति पदका लागि पाँच, दुई सचिवका लागि चार र दुई सहसचिवका लागि चारजना चुनावी प्रतिस्पर्धामा छन् । सभापतिबाहेक अरुको मत परिणाम आउन बाँकी छ ।
