निर्वाचन आयोगले लुम्बिनी प्रदेशमा आगामी १७ जेठमा हुने राष्ट्रिय सभा सदस्यको उपनिर्वाचनका उम्मेदवारलाई चुनावचिह्न प्रदान गरेको छ । आइतबार आयोगले विज्ञप्ति जारी गर्दै एमालेका उम्मेदवार चन्द्रबहादुर खडकालाई सूर्य चिह्न र कांग्रेसका उम्मेदवार दृगनारायण पाण्डेयलाई रूख चिह्न दिएको जनाएको छ ।
यसअघि माओवादी केन्द्रबाट निर्वाचित खड्का एकीकृत पार्टी विभाजन भएसँगै एमालेमा प्रवेश गरेका थिए । उनी एमालेमा प्रवेश गरेपछि माओवादी केन्द्रले उनलाई राष्ट्रिय सभा सदस्यबाट पदमुक्त गर्न सिफारिस गरेको थियो । उनी निर्वाचित लुम्बिनी प्रदेशको राष्ट्रिय सभा सदस्यको रिक्त पदमा हुन लागेको उपनिर्वाचनमा एमाले र कांग्रेसको मात्रै उम्मेदवारी परेको छ । आइतबार उम्मेदवारको अन्तिम नामावली प्रकाशन गरेर चुनाचिह्न प्रदान गरेको आयोगका सहसचिव तथा प्रवक्ता राजकुमार श्रेष्ठले बताए ।