महोत्तरीमा भएको बालिका हत्या प्रकरणलाई सुल्झाउने प्रयास चलिरहेको छ । अहिले जिल्लामा सर्वपक्षीय वार्ता चलिरहेको छ ।
इलाका प्रहरी कार्यालय बर्दिबासमा भइरहेको वार्तामा प्रजिअसहित सत्तारुढ दल नेकपा र प्रतिपक्षी दल नेपाली कांग्रेसका प्रतिनिधिहरू सहभागी छन् ।
वार्तामा नेपाली कांग्रेसका केन्द्रीय सदस्य एवं वार्ता समितिका संयोजक चिरञ्जीवी हमाल, नेकपाका जिल्ला अध्यक्ष राजु खड्का, प्रमुख जिल्ला अधिकारी कृष्णराज कटुवाल सहभागी छन् ।
त्यसैगरी प्रहरीका एसपी टीकाबहादुर केसी, सशस्त्र प्रहरीका एसपी सुरेश सापकोटा पनि सहभागी छन् । वार्तामा परिवारका भने कोही पनि सदस्य सहभागी छैनन् ।
वार्तामा बालिकाको परिवारलाई क्षतिपूर्तिको व्यवस्था हुनुपर्ने, त्यसैगरी आन्दोलनका क्रममा मंगलबार मृत्यु भएका सञ्जय भनिने बुद्धिराज न्यौपानेको परिवारलाई क्षतिपूर्ति दिनुपर्ने माग राखेका छन् ।
त्यसैगरी दोषीमाथि कडाभन्दा कडा कारबाही हुनुपर्ने माग राखिएको छ ।
बालिकाको शव पोस्टमार्टमका लागि काठमाडौं लगिएको थियो ।
प्रदर्शनकारीहरूले भने पूर्व–पश्चिम महेन्द्र राजमार्गको बर्दिबासमा विरोध प्रदर्शन गरिरहेका छन् ।
यसअघि प्रदर्शनकारीहरूले बर्दिबास नगरपालिकाका मेयर विदुर कार्कीको पुतला जलाएका थिए ।
७ गते आइतबार साँझ बर्दिबास– १४ सुगमबस्ती बस्ने सादिम आलमकी ६ वर्षीया छोरी गुलाब साह खातुन बेपत्ता भएकी थिइन् । उनको शव भने सोमबार मध्यरातमा भेटिएको थियो ।
हत्या गरी बोरामा कोचेर फालिएको अवस्थामा बर्दिबास– १४ सुगमबस्तीमै पर्ने सामुदायिक परिवार कल्याण संघ महोत्तरीको कार्यालयभन्दा पश्चिम विकरु साहको घरपछाडिको विनोद साहको खाली जग्गामा बालिकाको शव भेटिएको थियो ।
त्यसपछि स्थानीय हत्या आरोपीमाथि कडा कारबाहीको माग गर्दै आन्दोलनमा उत्रिएका हुन् ।