वीरगन्जमा कुटपिटबाट घाइते महिलाको उपचारका क्रममा मृत्यु, एक पक्राउ

पर्साको वीरगन्ज महानगरपालिका– १४, पिपरा चिनीमिलमा कुटपिटबाट घाइते भएकी एक महिलाको उपचारका क्रममा मृत्यु भएको छ। घटनामा संलग्न एकजनालाई प्रहरीले पक्राउ गरेको छ भने अर्का एकजनाको खोजी भइरहेको प्रहरीले जनाएको छ।

प्रहरीका अनुसार असार ३१ गते बिहान करिब १०:५० बजे सडक विस्तारका क्रममा भत्काइएको घरको इँटा हटाउने विषयमा भएको विवादका क्रममा स्थानीय अन्दाजी ५० वर्षीया लीलावती देवीमाथि मनोजप्रसाद कुर्मी र लक्कीप्रसाद पटेलले कुटपिट गरेका थिए।

कुटपिटबाट घाइते भएकी लीलावती देवीलाई उपचारका लागि नारायणी अस्पताल लगिएको थियो। अस्पतालमा उपचारपछि असार ३२ गते साँझ ५:४० बजे डिस्चार्ज गरिएकी उनी साउन १४ गते साँझ स्वास्थ्य अवस्था पुनः बिग्रिएपछि पुनः सोही अस्पतालमा भर्ना भएकी थिइन्। उपचारकै क्रममा साँझ ७ः२० बजे चिकित्सकले उनलाई मृत घोषणा गरेका थिए।

घटनापछि प्रहरी चौकी गण्डकबाट खटिएको प्रहरी सहायक निरीक्षकको टोलीले कुटपिटमा संलग्न लक्कीप्रसाद पटेललाई पक्राउ गरेको छ। घटनामा संलग्न अर्का मनोजप्रसाद कुर्मीको खोजी भइरहेको तथा घटनाबारे थप अनुसन्धान जारी रहेको प्रहरीले जनाएको छ।