- वि.सं २o८३ असार ३२ बिहीबार
नयाँ पत्रिका दैनिकका फोटो पत्रकार दिपेन्द्र ढुंगानासहित चारजना पत्रकार ‘सुरेश रजक साहसिक टेलिभिजन पुरस्कार २०८२’ बाट पुरस्कृत भएका छन् ।
एभिन्युज खबर टेलिभिजनले आफ्नो १९औँ वार्षिकोत्सवको अवसरमा आयोजना गरेको समारोहमा ढुंगानासहित कान्तिपुर टेलिभिजनका श्यामकृष्ण श्रेष्ठ, नेपाल प्रेस डटकमका उमेश कार्की र स्वतन्त्र पत्रकार शम्भु दंगाललाई पुरस्कृत गरेको हो । उनीहरूलाई संयुक्त रूपमा नगद एक लाख ११ हजार १११ रुपैयाँ र सम्मानपत्र प्रदान गरिएको छ ।
पुरस्कृत चारैजना पत्रकार गत वर्ष २३ भदौमा भएको ‘जेन–जी’ आन्दोलनका क्रममा समाचार संकलन गरिरहेका वेला घाइते भएका थिए ।
पुरस्कार छनोटका लागि वरिष्ठ पत्रकार तीर्थ कोइराला, लक्ष्मण उप्रेती र विनोद ढुंगेल सम्मिलित निर्णायक समिति गठन गरिएको थियो । १५ चैत ०८१ देखि १५ चैत ०८२ को अवधिसम्ममा साहसिक पत्रकारिता गरेका पत्रकारको काम, विशेष गरी ‘जेन–जी’ आन्दोलनमा उनीहरूले गरेको रिपोर्टिङ र देखाएको साहसको मूल्यांकन गरेर चारजनालाई संयुक्त रूपमा पुरस्कृत गर्ने निर्णय गरिएको निर्णायक समितिका सदस्य तीर्थ कोइरालाले बताए ।
एभिन्युजले १५ चैत ०८१ मा तीनकुनेमा भएको आन्दोलनको रिपोर्टिङका क्रममा ज्यान गुमाएका आफ्ना फोटो पत्रकार सुरेश रजकको स्मृतिमा पुरस्कार स्थापना गरेको थियो ।
