- वि.सं २o८२ जेठ १३ मंगलबार
काठमाडौं महानगरपालिकाको कार्यपालिका बैठक बोलाउन मेयर बालेन्द्र(बालेन) शाहमाथि दबाब बढेको छ । उपमेयर सुनिता डंगोलसहित ४१ जना सदस्यले सोमबार हस्ताक्षरसहित बैठक बोलाउन माग गर्दै पत्र लेखेका छन् ।
६ महिनादेखि बैठक बस्न नसकेकाले सबैको हस्ताक्षरसहित पत्र नै लेखेर बैठक माग गरिएको १७ नम्बर वडाका वडाअध्यक्ष नवीन मानन्धरले बताए । बैठक नबस्दा नीतिगत निर्णयदेखि बजेटसम्म प्रभावित हुने अवस्था आएको उनको भनाइ छ ।
पछिल्लो समय काठमाडौं महानगरपालिकामा मेयर शाह र अन्य जनप्रतिनिधिबिच दूरी बढेको छ । हालै मेयर शाहले जिम्मेवारी हेरफेर गर्दा पनि उनीहरुले त्यसलाई अस्वीकार गरेका थिए । मेयर एक्लै चल्न खोजेको र आफूहरुको सुझाव नै नसुन्ने गरेको उनीहरुको आरोप छ ।
उपमेयर डंगोलले नै सार्वजनिक रूपमा मेयरको आलोचना गर्दै आएकी छिन् । वडाध्यक्षहरुले पनि पछिल्लो समय मेयरसँग दूरी बढाएका छन् ।
मेयर शाहको सचिवालयले भने एमाले र कांग्रेसका वडाध्यक्ष तथा कर्मचारीले बालेनलाई असफल बनाउने प्रयास गरेको दाबी गरेको छ । मेयर शाहले प्रमुख कार्यकारी अधिकृत सरोज गुरागाईंलाई हटाउन बारम्बार पत्र लेख्दा पनि सरकारले मानेको छैन । मेयर र प्रमुख प्रशासकीय अधिकृतबिच नै बोलचाल नहुँदा महानगरमा समस्या बढ्दै गएको छ ।
