फ्रन्ट पेज प्रिन्ट संस्करण

लगानी सम्मेलनमा ५२ देशका ६३४ जना आउने पक्का

नेपालले एक हजार नौ सयभन्दा बढीलाई निम्तो पठाएकोमा ५२ देशका ४३ विशिष्ट व्यक्तिदेखि लगानीकर्ता र विज्ञसमेत गरी ६३४ जनाले सहभागी हुने जवाफ दिएका छन्, जवाफ आउने क्रम जारी

आसन्न तेस्रो लगानी सम्मेलनमा ५२ विदेशी मुलुकका ६३४ लगानीकर्ता, व्यावसायिक व्यक्ति, विज्ञ तथा सरोकारवालाहरूले सहभागिताको सुनिश्चित गरेका छन् । सरकारले सम्मेलनमा सहभागिताका लागि एक हजार नौ सयभन्दा बढी विदेशी सम्बन्धित व्यक्तित्वहरूलाई निम्तो पठाएकोमा मंगलबारसम्म ६३४ जनाले सहभागी हुने जवाफ पठाएका हुन् ।

तर, निम्तो स्वीकार गर्ने क्रम बाँकी रहेकाले यो संख्या अझै बढ्न सक्ने लगानी बोर्डका प्रवक्ता प्रद्युम्नप्रसाद उपाध्यायले बताए । उनका अनुसार सहभागिताका लागि जवाफ पठाउनेमध्ये अधिकांश लगानीकर्ता र व्यावसायिक व्यक्ति छन् । 

सरकारले आगामी १६ र १७ वैशाखमा लगानी सम्मेलन गर्दै छ । त्यसमा न्यूनतम एक हजार लगानीकर्ता, व्यावसायिक व्यक्ति, विज्ञ तथा सरोकारवाला उपस्थिति गराउने सरकारको लक्ष्य थियो । लक्ष्यअनुसार उपस्थिति हुने पक्का भएको छ । नेपालबाट सहभागी हुने ३८५ समेत जोड्दा एक हजार १९ व्यक्ति सम्मेलनमा उपस्थित हुने निश्चित भइसकेको छ । यसमा अनलाइनबाट आफैँ नाम दर्ता गरेका थप लगानीकर्ता, उद्योगी, व्यावसायिक व्यक्ति तथा सरोकारवालाहरू थपिनेछन् । हाल अनलाइनबाट नाम टिपाएका आवेदकहरूको छनोट गर्ने काम पनि भइरहेको बोर्डले जनाएको छ । 

बोर्डको तथ्यांकअनुसार नेपालबाहेक चीनबाट सबैभन्दा धेरै लगानीकर्ता आउने देखिन्छ । हालसम्म चीनका २६५, भारतका १४३ र अमेरिकाका ३३ जना लगानीकर्ता, व्यावसायिक तथा सरोकारवालाले निम्तो स्वीकार गरेका छन् । त्यस्तै जापानका २८, युकेका १४, बंगलादेश र युएईका १३/१३ र जर्मनीका १० जनाले सहभागिताको प्रतिबद्धता जनाएका छन् । दक्षिण एसिया र अस्ट्रेलियाबाट ९/९, पाकिस्तानबाट आठ, सिंगापुरबाट ६, कतार र घानाबाट पाँच/पाँच,  साउदी अरब, फ्रान्स र बहराइनबाट चार/चार तथा स्विट्जरल्यान्ड, फिनल्यान्ड, अस्ट्रिया, रसिया र कोलम्बियाबाट तीन/तीनजना लगानीकर्ता, व्यावसायिक तथा सरोकारवालाले निम्तो स्वीकार गरेका छन् । यीबाहेक, क्यानडा, कुवेत, पोल्यान्ड, मेक्सिको, दक्षिण अफ्रिका, बेल्जियमलगायतका देशका लगानीकर्ताले पनि लगानी सम्मेलनको निम्तो स्वीकार गरिसकेका छन् । 

विश्वका १७ अर्बपतिलाई निम्तो : सहभागी हुन नसक्ने ज्याक मा र जेफ बेजोसको जवाफ, अन्यको जवाफ आएन 
विदेशबाट ६ सय बढी लगानीकर्ता नेपाल आउने सुनिश्चित हुँदा धनाढ्य  अर्थात् अर्बपतिहरूले भने निम्तो स्वीकार गरेका छैनन् । सरकारले विभिन्न कूटनीतिक नियोगमार्फत गत माघमै एलन मस्क, गौतम अडानी, ज्याक मा, मार्क जुकरवर्ग, जेफ बेजोसजस्ता १७ अर्बपतिलाई लगानी सम्मेलनमा सहभागी हुन निम्तो पठाएको थियो । उनीहरूलाई वक्ताकै रूपमा आमन्त्रण गरिएको थियो । तर, ज्याक मा र जेफ बेजोसले भने सम्मेलनमा सहभागी हुन नसक्ने जानकारी गराए पनि अन्य १५ जनाले कुनै जवाफ नपठाएको बोर्डका एक अधिकारीले जानकारी दिए । 

भारतीय अर्बपति गौतम अडानीले पनि अहिलेसम्म कुनै जवाफ पठाएका छैनन् । गत पुसमा तत्कालीन अर्थमन्त्री डा. प्रकाशशरण महत भारत भ्रमणमा जाँदा अडानीसँग भेटवार्ता भएको थियो । त्यसक्रममा अडानीले लगानी सम्मेलनमा सहभागी हुने प्रतिबद्धता गरेका थिए । त्यसपछि उनलाई औपचारिक निम्तो पनि पठाइएको थियो । तर, त्यसको जवाफ अझै प्राप्त भएको छैन । सत्तासमीकरण परिवर्तनसँगै अर्थमन्त्री परिवर्तन भएका कारण अडानी आउन नचाहेको हुन सक्ने बोर्डविज्ञहरू बताउँछन् । हाल माओवादी नेता वर्षमान पुन अर्थमन्त्री छन् ।