- वि.सं २o८१ बैशाख २३ आइतबार
उपत्यकाका विभिन्न स्पा, मसाज सेन्टर तथा गेस्टहाउसमा नाबालिकालाई जबर्जस्ती यौनधन्दामा लगाउने गरेको पाइएपछि प्रहरीले निगरानी बढाएको छ । यसक्रममा प्रहरीले एक स्पा सेन्टर र गेस्टहाउसमा छापा मारेको छ ।
मानव बेचबिखन अनुसन्धान ब्युरोबाट खटिएका प्रहरीले स्पा र गेस्टहाउसबाट पाँचजना नाबालिकाको उद्धार गरेको छ । ब्युरोले आइतबार गोंगबुस्थित गेस्टहाउसबाट तीन नाबालिकाको उद्धार पनि गरेको छ । घटनामा संलग्न तनहुँ भिमाद नपा–२ की २५ वर्षीया सपना तामाङ भनिने पूजा रानालाई प्रहरीले पक्राउ गरेको छ ।
प्रहरीका अनुसार उनले विभिन्न प्रलोभनमा फसाई नाबालिकालाई ग्रामीण क्षेत्रबाट जम्मा गर्थिन् र जबर्जस्ती यौनधन्दामा लगाउँथिन् । नाबालिकालाई लुकाएर राख्न उनले कोठा नै भडामा लिएकी थिइन् । सोही कोठाबाट उनले सम्पर्कमा आएका ग्राहककहाँ नाबालिका पठाउँथिन् । उनले १० महिनादेखि यसरी नै यौनधन्दामा लगाउँदै आएको प्रहरीको अनुसन्धानबाट खुलेको छ ।
ब्युरोले गत ११ असोजमा रातोपुलस्थित नुवाकोट ब्युटिपार्लर एन्ड स्पा सेन्टरमा छापा मारेको थियो । सेन्टरबाट प्रहरीले दुई नाबालिकाको उद्धार गरेको थियो । घटनामा संलग्न सेन्टरका सञ्चालक संखुवासभा चिचिला गापा–१ का ४३ वर्षीय दिनेश पौडेललाई प्रहरीले पक्राउ गरेको थियो ।
