चीनमा उपचाररत गृहमन्त्री श्रेष्ठको स्वास्थ्य सुधारोन्मुख, शुक्रबार डिस्चार्ज गरिने

बुधबार राति हृदयाघात भएपछि उपचारका लागि बेइजिङस्थित पेकिङ युनियन मेडिकल कलेज अस्पतालमा भर्ना गरिएका उपप्रधानमन्त्री एवं गृहमन्त्री नारायणकाजी श्रेष्ठको स्वास्थ्यमा सुधार भएको छ । बिहीबार अस्पतालले विज्ञप्ति निकाल्दै श्रेष्ठको स्वास्थ्य सुधारोन्मुख रहेको जनाएको छ । 

‘उहाँ पूर्ण होसमा हुनुहुन्छ, स्वास्थ्यमा सुधार भइरहेको महत्वपूर्ण संकेत देखिएको छ,’ अस्पतालको सूचनामा छ । अस्पतालका अनुसार उपप्रधानमन्त्री श्रेष्ठलाई निगरानीका लागि सघन उपचार कक्षमा राखिएकोे छ । आइसियूमा राखेर उच्च सतर्कताका साथ उनको उपचार थालिएपछि उपचार सहज बनेको अस्पतालले जनाएको छ । 

श्रेष्ठका प्रेस सल्लाहकार कमल गिरीले मन्त्री श्रेष्ठको स्वास्थ्यमा सुधार भइसकेको र दोहोरो कुराकानी हुन थालेको जानकारी दिए । ‘आइसियूको प्रोटोकलअनुसार पनि २४ घन्टा राख्नुपर्छ, सोहीअनुसार पनि छिटो डिस्चार्ज नगरिएको हो,’ उनले भने, ‘उहाँको अवस्था सामान्य छ, नेपालतर्फ पनि फोनमा कुराकानी गर्न थाल्नुभएको छ ।’ 

हृदयाघात भएका श्रेष्ठलाई ‘एक्युट मायोकार्डियल इन्फेक्सन’ भएपछि आकस्मिक कोरोनरी एन्जियोग्राफी गरिएको थियो । एन्जियोेग्राफीका क्रममा ‘ओब्टस मार्जिनल शाखा’मा अवरोध देखिएको थियो । अस्पतालका अनुसार उनको मुटुको बायाँ धमनीमा महत्वपूर्ण ‘स्टेनोसिस’ देखिएको र त्यसलाई कम गर्न तुरुन्तै ‘स्टेन्ट’ राखिएको छ । 

‘तेस्रो बेल्ट एन्ड रोड फोरम फर इन्टरनेसनल कोअपरेसन (बिआरएफ)मा सहभागी हुन उपप्रधानमन्त्री एवं गृहमन्त्री श्रेष्ठ चीनको बेइजिङ पुगेका थिए । उनको स्वास्थ्यमा समस्या देखिएपछि चिनियाँ सरकार र पार्टीका उच्च अधिकारीहरूले उच्चतम प्रविधि अपनाउन र उनको उपचारमा विशेष ध्यान दिन अस्पताल प्रशासनलाई निर्देशन दिएका थिए । श्रेष्ठ शुक्रबार डिस्चार्ज हुने बताइएको छ । 

चीनका लागि नेपाली राजदूत विष्णुपुकार श्रेष्ठले गृहमन्त्रीलाई भेटेर स्वास्थ्यलाभको कामना गरेका छन् । उनका अनुसार उपप्रधानमन्त्री श्रेष्ठको स्वास्थ्य अवस्था राम्रो छ र दोहोरो संवाद 
भएको छ ।