- वि.सं २o८१ बैशाख २० बिहीबार
चाइना लाइफ इन्स्योरेन्स ग्रुपका पूर्वअध्यक्ष तथा कम्युनिस्ट पार्टीका पूर्वप्रमुख वाङ बिनलाई घुस लिएको र विदेशमा बचत लुकाएको अभियोगमा मंगलबार दुई वर्षको जेलपछि मृत्युदण्डको सजाय कार्यान्वयन हुने फैसला भएको छ ।
पूर्वी चीनको सान्दोङ प्रान्तको जिनानस्थित ‘इन्टरमिडिएट पिपुल्स कोर्ट’ले उक्त फैसला सुनाएको हो ।
सन् १९९७ देखि २०२१ को बीचमा वाङले विभिन्न वित्तीय संस्थामा आफ्नो ओहदाको फाइदा उठाउँदै अरूका लागि फाइदा लिन खोजेको र बदलामा ३२ करोड ५० लाख युआन (करिब चार करोड ५० लाख अमेरिकी डलर) बराबरको पैसा र बहुमूल्य सामान प्रत्यक्ष वा आफ्ना नातेदारमार्फत गैरकानुनी रूपमा लिएको स्विकारेका थिए ।
उनलाई सन् २०१२ को जनवरीदेखि हङकङमा आफ्ना नातेदारले खोलेको खातामा पाँच करोड ६४ लाख २० हजार युआनबराबरको विदेशी मुद्रा जम्मा गरेको र बचत लुकाएको अभियोगमा दोषी ठहर गरिएको अदालतले जनाएको छ ।
फैसलाबमोजिम प्रतिवादीलाई आजीवन राजनीतिक अधिकारबाट वञ्चित गरिएको र निजको व्यक्तिगत सम्पत्ति जफत गरिएको छ ।
दुई वर्षको जेल सजायपछि वाङको मृत्युदण्डलाई कानुनबमोजिम आजीवन कारावासमा परिणत गर्न सकिनेछ, तर थप कटौती वा छुट प्रदान गरिनेछैन ।
