- वि.सं २o८१ जेठ २ बुधबार
पाकिस्तानको सतलज नदीमा थाली जमाल ओकारानजिकै डुंगा पल्टिँदा महिला र बालबालिकासहित सातजनाको मृत्यु भएको छ । एआरवाई न्युजले स्रोतलाई उद्धृत गर्दै सोबारे जानकारी दिएको छ ।
स्रोतका अनुसार डुंगा अत्यधिक भारका कारण पल्टिएको हो । डुंगामा ५० भन्दा बढी मानिस सवार थिए । नदीबाट सातजनाको शव निकालियो भने धेरै यात्रुले ज्यान जोगाउन सफल भएका थिए ।
पञ्जाबका कार्यवाहक मुख्यमन्त्री मोहसिन नक्वीले सम्बन्धित अधिकारीहरूलाई उद्धार कार्यलाई तीव्रता दिन निर्देशन दिएका छन् । यसअघि उमरकोट जिल्लाको धोरो नारोनजिक कलंकर तालमा डुंगा पल्टिँदा कम्तीमा ६ जनाको मृत्यु भएको एआरवाई न्युजले जनाएको छ ।
यसैगरी, सेहर फकिर दरबारमा श्रद्धाञ्जली अर्पण गर्न दशजना चढेको डुंगा पल्टिँदा ६ जनाको डुबेर मृत्यु भएको हो । घटनास्थलमा प्रहरी र उद्धार टोलीले पोखरीबाट तीन बालबालिकाको शव निकालेको छ । अन्धकारका कारण उक्त क्षेत्रमा उद्धार कार्य रोकिएको र बेपत्ता भएका तीनजनाको खोजीका लागि बिहान पुनः सुरु गरिने एआरवाई न्युजले जनाएको छ । (रासस)
