- वि.सं २o८१ जेठ ६ आइतबार
म्यानमारकी प्रजातन्त्रवादी नेतृ आङ सान सुकीलाई त्यहाँको सैनिक सरकारले आंशिक माफी दिएको छ । उनीमाथि लगाइएका पाँचवटा आपराधिक मुद्दामा माफी दिइएको म्यानमारको सरकारी सञ्चार माध्यमले जनाएको छ । केही मुद्दामा माफीपछि पनि सुकीले १४ अन्य मुद्दामा लड्नुपर्नेछ । म्यानमारमा मनाइने आषाढ पूजाका अवसरमा सात हजार बन्दीलाई रिहाइको घोषणा गरेसँगै ७८ वर्षीया नोबेल शान्ति पुरस्कार विजेता सुकीविरुद्धका पाँचवटा मुद्दालाई मुल्तबीमा राखेर क्षमादान गरिएको हो ।
सुकीलाई भ्रष्टाचार, ‘वाकिटकी’ राखेको, कोरोना भाइरसविरुद्धका नियम पालना नगरेकोलगायत अपराधमा दोषी ठहर गर्दै ३३ वर्षको कारवास सजाय तोकिएको छ । दुई वर्षअघि ‘नेसनल लिग फर डिमोक्रेसी’की नेतृ सुकीको सरकारलाई अपदस्थ गरेयता म्यानमारका विभिन्न भागमा भएका आन्दोलनमा सैन्य सरकारले करिब ६ हजार सर्वसाधारणको ज्यान लिएकोे अधिकारवादी समूहले बताएका छन् ।
तथापि म्यानमारका स्थानीय निकायले तीन हजार आठ सयजनाभन्दा बढीले ज्यान गुमाएका बताएको छ भने सैनिक अधिकारीले त्यो संख्या पाँच हजारको हाराहारीमा पुगेको जनाएका छन् । त्यस्तै म्यानमारको सैन्य सरकारले देशमा लागू संकटकाललाई थप ६ महिनाका लागि थपेको छ ।
