- वि.सं २o८१ बैशाख २० बिहीबार
बाजुराको बुढीगंगा नगरपालिकाका कर्मचारीहरू सुरक्षाको माग गर्दै आन्दोलनमा उत्रिएका छन्। आकस्मिक स्वास्थ्य सेवाबाहेक अन्य सबै सेवा बन्द गरी कर्मचारीहरू जिल्ला प्रशासन कार्यालयअगाडि आन्दोलनमा उत्रिएका हुन्।
बुढीगंगा नगरपालिका– ७ का वडाध्यक्ष भुवनसिंह केसीका छोरा दिलीप केसीले यही असार २१ गते कर्मचारीमाथि गाली–गलौजसहित हातपात गरेका थिए। राज्यको सम्पत्ति दुरुपयोग गर्नबाट रोक्न खोज्दा उल्टै ज्यान मार्ने धम्की र मुद्दा खेप्नुपर्ने अवस्था आएकाे भन्दै कार्यालयको सम्पूर्ण कामकाज बन्द गरी कर्मचारीहरू आन्दोलनमा उत्रिएका हुन्।
वडाध्यक्ष केसीका छोरा दिलीपले कर्मचारीमाथि हातपात गरेपछि पीडित कर्मचारीले कानुनी बाटो अपनाउँदा उनलाई ज्यान मार्ने धम्की दिएको नगरपालिका कर्मचारी डम्मर थापाले बताए। कानुनबमोजिम न्याय नपाउन्जेल कार्यालय बन्द रहने उनको भनाइ छ।
नगरपालिकाका कर्मचारीहरूले संयुक्त रूपमा एक विज्ञप्ति जारी गर्दै जिउज्यानको सुरक्षाको माग गरेका छन्। उनीहरूले सुरक्षित रूपमा काम गर्ने वातावरण सिर्जना गर्न र सुरक्षाको प्रत्याभूति दिलाउन माग गरेका छन्।
दिलीप केसीले गत बिहीबार दिउँसो नगरपालिकाका प्रमुख प्रशासकीय अधिकृत नरेन्द्र नाथ र इन्जिनियर उप्रेन्द्र साउदलाई हातपात गर्नुका साथै गालीगलौज गरेकाले निजलाई कानुनी दायरामा ल्याउनुको साटो उल्टै कर्मचारीलाई मुद्दा हालेर काम गर्ने वातावरण बिगारेको विज्ञप्तिमा उल्लेख छ।
योजनाको काम कम भएको, तर बिल उठाएर पूरै भुक्तानी दिनुपर्ने भन्दै केसीले कर्मचारीमाथि हातपात र गालीगलौज गरेका थिए। केसीले यसआघि पनि फोन गरेर कर्मचारीलाई धम्क्याइरहेको नगरपालिकाका कर्मचारी वसन्त थापाले बताए। कर्मचारीले कामअनुसारको बिल उठाउने भनेका थिए, तर उनले पूरै बिल उठाउने भन्दै कर्मचारीमाथि आक्रमण गर्न खोजेका विज्ञप्तिमा उल्लेख छ।
