- वि.सं २o८१ बैशाख २२ शनिबार
सिराहाको मिर्चैयामा रहेको मिर्चैया साना सहरी खानेपानी तथा सरसफाइ उपभोक्ता संस्थामा कार्यरत एकजना सुरक्षागार्डको हत्या भएको छ ।
खानेपानी ट्यांकीको सुरक्षामा खटिएका मिर्चैया नगरपालिका- ८ का ६२ वर्षीय किशोरी रायको हत्या भएको हो । रातिको समयमा ड्युटी गरिरहेका उनको घाँटीमा धारिलो हतियार प्रहार गरी हत्या गरिएको इलाका प्रहरी कार्यालय मिर्चैयाले जनाएको छ ।
उनी आठ महिनादेखि मिर्चैया साना सहरी खानेपानी तथा सरसफाइ उपभोक्ता संस्थामा कार्यरत थिए । यस विषयमा अनुसन्धान गर्न मधेस प्रदेश प्रहरी कार्यालयबाट कुकुरसहितको विशेष प्रहरी टोली परिचालन भएको इलाका प्रहरी कार्यालयका प्रहरी नायब उपरीक्षक जितेन्द्र बस्नेतले बताएका छन् ।
सुरक्षागार्डले खानेपानी ट्यांकीको सुरक्षासँगै खानेपानी खोल्ने र बन्द गर्ने काम गर्दै आएका थिए ।मिर्चैया साना सहरी खानेपानी तथा सरसफाइ उपभोक्ता संस्थाका अध्यक्ष अजय साहले घटनाको सूक्ष्म रूपमा अनुसन्धान गर्नुपर्ने बताएका छन् ।
