रुकुममा पहिलोपटक मनाइयो ओलम्पिक दिवस 

रुकुम पश्चिममा पहिलो पटक ओलम्पिक दिवस मनाइएको छ। दिवसको अवसरमा जिल्ला सदरमुकाम मुसिकोट खलंगामा पुरुष ब्याडमिन्टन प्रतियोगिता सुरु भएको छ। 

जिल्ला ब्याडमिन्टन संघले भेट्रान (४५ वर्षमाथि) र नन भेट्रान (४५ वर्षमुनि) गरी दुईवटा इभेन्टमा ब्याडमिन्टन प्रतियोगिता आयोजना गरेको छ।

प्रतियोगिताको शुक्रबार बिहान जिल्ला समन्वय समिति प्रमुख लुम्बिनी गौतमले उद्घाटन गरिन्। प्रतियोगितामा भेट्रानतर्फ आठ र ननभेट्रानतर्फ ५८ जोडीले भाग लिएका छन्। खेल खलंगास्थित बराहटाकुरा कभर्डहलमा सञ्चालन भइरहेको छ। 

प्रतियोगिता नकआउट सिस्टममा सञ्चलन भइरहेको र भोलिसम्म जारी रहने जिल्ला ब्याडमिन्टन संघका अध्यक्ष अनिल बुढाले जानकारी दिए। जिल्लामा पहिलोपटक खेलकुद प्रतियोगिता आयोजना गरेर ओलम्पिक दिवस मनाइरहेको उनको भनाइ छ। 

हरेक वर्ष अंग्रेजी महिनाको जुन ३ देखि २३ सम्म विभिन्न कार्यक्रम गरेर ओलम्पिक दिवस मनाउने गरिएको छ। शुक्रबार बिहान एक कार्यक्रमको आयोजना गरी प्रतियोगिताको उद्घाटन गरिएको हो। प्रतियोगितामा सहभागी सबै खेलाडीलाई पोसाक र प्रमाणपत्रको व्यवस्था गरिएको आयोजकले जनाएको छ।