- वि.सं २o८१ बैशाख २० बिहीबार
नवप्रवेशी चर्च ब्वाइज युनाइटेड क्लबले सहिद स्मारक ‘ए’ डिभिजन लिगको शीर्ष स्थानमा दुई अंकको अग्रता लिएको छ । दशरथ रंगशालामा भएको खेलमा चर्च ब्वाइजले सातदोबाटो युथ क्लबलाई १–० को झिनो अन्तरले हराउँदै शीर्ष स्थानमा केवल दुई अंकको अग्रता लिएको हो । चर्च ब्वाइजले १८ खेलबाट ३३ अंक जोडेको छ । दोस्रो स्थानमा रहेको जावलाखेलले समान खेलबाट ३१ अंक बटुलेको छ ।
पहिलोपटक माथिल्लो डिभिजन लिग खेलिरहेको चर्च ब्वाइजले १८ खेलमा नौ जित र ६ बराबरी नतिजा निकालेको छ । चर्च ब्वाइज तीन खेलमा मात्र पराजित भएको छ । यसैगरी, दोस्रो स्थानमा रहेको जावलाखेलले १८ खेलमा नौ जित र चार बराबरी सामना गरेको छ । जावलाखेलले पाँच खेलमा अंक गुमाएको थियो ।
लिगको तेस्रो स्थानमा दुईपटकको साबिक विजेता मच्छिन्द्र क्लब रहेको छ । मच्छिन्द्रले १८ खेलबाट ३० अंक जोडेको छ । मच्छिन्द्रले आठ जित, ६ बराबरी र चार खेलमा हारको सामना गरेको छ । मच्छिन्द्र र चर्च ब्वाइजबीच तीन अंकको दूरी रहेको छ ।
सुभाषको निर्णायक गोल
दशरथ रंगशालामा चर्च ब्वाइज र सातदोबाटोबीचको खेल प्रतिस्पर्धात्मक भयो । खेलको पहिलो हाफमा दुवै क्लबले गोलरहित बराबरी खेलेका थिए । खेलको ६३औँ मिनेटमा सुभाष गुरुङले चर्च ब्वाइजलाई १–० को अग्रता दिलाए । सातदोबाटोका खेलाडीले डिबक्सभित्र राम्रोसँग बललाई क्लियर गर्न नसकेको फाइदामा गुरुङले सहजै गोल गरे । खेलमा थप गोल भएन । उनकै गोलमा चर्च ब्वाइजले महत्वपूर्ण तीन अंक हात पार्यो । सातदोबाटो २६ अंकका साथ पाँचौँ स्थानमा रह्यो ।
तनाव कम गर्दै पुलिस
नेपाल पुलिस क्लबले रेलिगेसन क्षेत्रको तनाव कम पार्दै छ । लिगअन्तर्गत मंगलबार भएको विभागीय डर्बीमा पुलिसले नेपाल एपिएफलाई १–० ले हराएको छ । च्यासल मैदानमा महत्वपूर्ण तीन अंक बटुलेको पुलिसले रेलिगेसन तनाव थप कम गरेको छ । पुलिसले २२ अंक जोडेको छ । एपिएफको पनि समान २२ अंक छ । पुलिस पहिलो लेगमा एपिएफसँग २–० ले पराजित भएको थियो । पुलिस १०औँ स्थानमा उक्लेको छ । एपिएफ ११औँ स्थानमा छ । रेलिगेसन क्षेत्रमा फ्रेन्ड्स र खुमलटार रहेका छन् ।
