नेपाललाई जित्नैपर्ने दबाबमा भुटान

प्रधानमन्त्री थ्री नेसन्स कप फुटबल प्रतियोगिताअन्तर्गत मंगलबार आयोजक नेपाल र भुटानबीच दशरथ रंगशालामा प्रतिस्पर्धा हुँदै छ । नेपालले फाइनल स्थान पक्का गर्न भुटानलाई बराबरीमा रोक्दा नै काफी छ । भुटानले अन्तिम दुई स्थान सुरक्षित गर्न नेपाललाई हराउनैपर्ने समीकरण छ । नेपालले प्रतियोगिताको पहिलो खेलमा लाओसलाई २–० ले हराएको थियो । 

लाओसले आफ्नो अर्को खेलमा भुटानलाई अन्तिम समयमा २–१ ले निराश बनाएको थियो । शीर्ष दुई टोलीबीच फाइनल खेल हुनेछ । नेपालले एक खेलबाट तीन र दुई खेलबाट लाओसले तीन अंक बटुलेको छ । फिफा वरीयताको १८५औँ स्थानमा रहेको भुटानले लाओसविरुद्ध बल पकड राम्रो बनाएको थियो । तर, भुटान फिनिसिङमा चुक्दा लाओससँग पराजित भयो । जित्र्नैपर्ने भएकाले नेपालको तुलनामा भुटान दबाबमा देखिन्छ । भुटानले कम्तीमा नेपालविरुद्ध ३–० को जित निकाल्नुपर्ने हुन्छ । भुटानकोहार वा बराबर नतिजाले लाओस फाइनलमा पुग्नेछ । 

भुटानविरुद्ध सबै खेलमा विजयी
खेल तथ्यांकअनुसार नेपाल भुटानभन्दा बलियो छ । अहिलेसम्म भुटान र नेपालबीच १३ अन्तर्राष्ट्रिय खेल भएको छ । जसमा नेपालले सबै खेलमा जित निकालेको छ । भुटानले नेपाललाई एकपटक पनि बराबरीमा रोक्न सकेको छैन । नेपाल र भुटानबीच अन्तिमपटक सन् २०१८ को साफ च्याम्पियनसिपमा भेट भएको थियो । जसमा नेपाल ४–० ले विजयी भएको थियो । पछिल्लो समय भुटानले घरेलु लिगसँगै अन्तर्राष्ट्रिय प्रदर्शनमा समेत सुधार गरेको छ । भुटान विपक्षीविरुद्ध केही हावी हुँदै आएको छ । भुटानले विपक्षीसँगको प्रतिस्पर्धामा गोलअन्तरसमेत कम गर्दै आएको छ । 

नेपाली खेलाडीबीच तालमेल अभाव
अधिकांश सिनियर खेलाडी अस्ट्रेलिया पलायन हुँदा नेपाली टोलीको खेलाडीबीच आपसी तालमेल अभाव देखिन्छ । लाओससँगको प्रतिस्पर्धामा खेलाडीले एकआपसमा राम्रोसँग पास उपलब्ध गराउन सकेका थिएनन् । नेपालको मिडफिल्ड राम्रोसँग चल्न सकेको थिएन ।

भुटानले भने लाओसँगको खेलमा सुन्दर फुटबल खेलेको थियो । यद्यपि, फिनिसिङमा भुटान कमजोर देखियो । सुजल श्रेष्ठ, सुमन अर्याल, दिनेश राजवंशी, तेज तामाङ, सुनील बल, दर्शन गुरुङ, विशाल राई, अभिषेक रिजाल, सुमन लामा र आशिष लामालगायत नियमित खेलाडी विदेश पलायनका कारण नेपाली टोली पुनर्निर्माणको संघारमा छ । नेपालका लागि इटालियन प्रशिक्षक भिसेन्जो अल्बर्टाे एनेसले लाओसविरुद्ध ‘प्लेइङ सेट’मा युवा रक्षक सनिस श्रेष्ठलाई डेब्यु गराएका थिए ।  

किरणविरुद्ध चेन्चो
नेपाली टोलीका कप्तान किरणकुमार लिम्बू र भुटानका कप्तान चेन्चो ग्लात्सेनबीचको प्रतिस्पर्धासमेत हो । व्यावसायिक फुटबलमा दुवै खेलाडी भारतीय पञ्जाब एफसीबाट खेल्ने गर्छन् । यस सिजन पञ्जाब आईलिग च्याम्पियन हुँदा दुवै खेलाडीको प्रदर्शन उत्कृष्ट रह्यो । पञ्जाब इन्डियन सुपर लिग (आइएसएल)मा बढुवा हुँदा किरण उत्कृष्ट गोलरक्षक भएका थिए । ‘हामी क्लबमा खेल्दा पनि निकै रमाइलो गर्छाैं । एकअर्कासँग राम्रो सम्बन्ध छ ।

राष्ट्रिय टोलीबाट खेल्दाका क्षण स्मरण गर्दै ठट्टा गर्छौं,’ किरणले भनेका छन् । अर्कोतिर, भुटानी कप्तान चेन्चोले पनि किरणसँगको सम्बन्ध राम्रो भएको जनाए । ‘राष्ट्रका लागि गोल गर्ने र रोक्ने विषयमा हामीबीच कुरा भइरहन्छ,’ चेन्चो भन्छन् । किरण नेपालका लागि सर्वाधिक क्याप जित्ने खेलाडी हुन् ।