पोखरा महानगरपालिकाको मतगणनामा नेकपा एकीकृत समाजवादीले अग्रता कायम राखेको छ । १,६०० मतको गणना हुँदा गठबन्धनको तर्फबाट प्रमुख पदका उम्मेदवार एकीकृत समाजवादीका धनराज आचार्यले ६१३ मत पाएका छन् भने एमालेका तर्फबाट प्रमुख पदका उम्मेदवार कृष्ण थापाले ५८३ मत पाएका छन् ।
त्यस्तै, उपप्रमुखमा गठबन्धनका तर्फबाट कांग्रेसकी कोपिला रानाभाटले ७१६ मत प्राप्त गरेका छिन् भने एमालेकी मञ्जुदेवी गुरुङले ५८३ मत प्राप्त गरेकी छिन्। अहिले महानगरमा वडा नं १, २ र १२ को मतगणना भइरहेको छ ।
कास्कीको माछापुच्छ्रे गाउँपालिकाको वडा नं १ मा गठबन्धन विजयी भएको छ भने २, ३ र ४ मा कांग्रेसको प्यानल र वडा नं ५ मा वडाध्यक्ष तथा एकजना सदस्य कांग्रेस र अन्य एमालेका उम्मेदवार विजयी भएका छन् । माछापुच्छ्रेको अध्यक्षमा कांग्रेसका उम्मेदवार मीनबहादुर गुरुङ ३,९३० मतसहित अग्रता हासिल गरेका छन् भने एमालेका विक्रम गुरुङले ३,५०६ मत प्राप्त गरेका छन् ।
त्यस्तै, उपाध्यक्षमा कांग्रेसकी सीता अधिकारीले ३,५५६ मत प्राप्त गरेकी छिन् भने एमालेका सीता तिवारीले ३,२५५ मत प्राप्त गरिन् । अन्नपूर्ण गाउँपालिकाको वडा नं १० मा कांग्रेसको प्यानल नै विजयी भएको छ भने वडा नं. ११ मा एमालेको प्यानल विजयी भएको छ ।
मादी गाउँपालिकाको वडा नं. १ र २ मा कांग्रेसको प्यानल विजयी भएको छ । रूपा गाउँपालिकामा वडा नं १ मा कांग्रेसको प्यानल विजयी भएको छ भने वडा नं. २ र ३ मा एमालेको प्यानल विजयी भएको छ ।
